قازىرگى ۋاقىتتا جەكپە-جەكتىڭ ناقتى قاي ەلدە جانە قاي قالادا وتەتىنى بەلگىسىز, دەگەنمەن ءبىرىنشى جانە ەكىنشى جەكپە-جەكتەر اقش-تىڭ لاس-ۆەگاس قالاسىنداعى T-Mobile ارەناسىندا ۇيىمداستىرىلعان بولاتىن. بوكس ماماندارىنىڭ بولجامىنشا, ءۇشىنشى ايقاس تا ءدال وسى نەۆادا شتاتىندا وتكىزىلۋى مۇمكىن. ازىرگە بارشا الەم جانكۇيەرى كوز تىككەن بوكس كەشى اقش پەن كانادادا DAZN PPV جۇيەسى ارقىلى اقىلى تۇردە كورسەتىلەتىنى بەلگىلى بولدى. سونىمەن قاتار الەمنىڭ باسقا مەملەكەتتەرى DAZN پلاتفورماسى ارقىلى تاماشالاي الادى.
«مەن جىلدىڭ ەكىنشى جارتىسىندا دا جانكۇيەرلەرىمە ءوزىمنىڭ ەڭ ۇزدىك جەكپە-جەگىمدى كورسەتەتىنىمە وتە قۋانىشتىمىن. بۇل ايقاستا الدىڭعى ەكى جەكپە-جەكتەگىدەي ەشقانداي ەرەكشەلىك بولمايدى», دەدى كانەلو الەۋمەتتىك جەلىدەگى پاراقشاسىندا. ال وتانداسىمىز جانكۇيەرلەرىن 17 قىركۇيەكتەگى ايقاسقا شاقىردى. «مەن بارشاڭىزدى 17 قىركۇيەكتەگى جەكپە-جەكتە كۇتەمىن», دەدى گولوۆكين.
ەسكە سالا كەتەيىك, 2017 جىلدىڭ قىركۇيەگىندە وتكەن العاشقى باسەكەدە الۆارەس پەن گولوۆكيننىڭ كۇشتەرى تەڭ تۇسسە, 2018 جىلدىڭ مامىرىنداعى قارىمتا جەكپە-جەكتە مەكسيكالىق بوكسشى تورەشىلەردىڭ شەشىمىمەن جەڭىسكە جەتكەن بولاتىن.
2022 جىلدىڭ جارتىجىلدىعىندا ەكى بوكسشى دا ءبىر-ءبىر جەكپە-جەك وتكىزدى: وتانداسىمىز گەننادي گولوۆكين ءساۋىر ايىندا جاپونيادا ريوتا مۋراتانى جەڭسە, «كانەلو» مامىر ايىندا دميتري بيۆولدان ۇپاي سانى بويىنشا جەڭىلىپ قالعان-دى. دەگەنمەن مەكسيكالىق بوكسشى سۋپەر ورتا ساناتتاعى ءابسوليۋتتى چەمپيون اتاعىن ساقتاپ قالدى (76,2 كگ-عا دەيىن), سەبەبى بۇل جەكپە-جەكتە ول ءبىر سالماق جوعارى كوتەرىلگەن بولاتىن.
ايتا كەتەيىك, الۆارەس پەن گولوۆكيننىڭ ءۇشىنشى جەكپە-جەگى سۋپەر ورتا سالماقتا, ياعني 76,2 كيلوعا دەيىنگى سالماق دارەجەسىندە وتەدى. بۇعان دەيىنگى ەكى كەزدەسۋدە بوكسشىلار ورتا سالماقتا (72,6 كگ) جۇدىرىقتاسقان بولاتىن.
