سوت ءىسى قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالدى. قىلمىستىق ءىس ماتەريالىنا سايكەس, ايىپتالۋشى ۇرلىق جاساعانىن جاسىرۋ ماقساتىندا وتباسىنىڭ ءۇش مۇشەسىن ولتىرگەن.
تەرگەۋ وتكەن جىلدىڭ 11 تامىزىندا سوتتالۋشىنىڭ ارىپتەسىنىڭ گاراجىنان ۇرلەنەتىن رەزەڭكە قايىقتى ۇرلاپ كەتكەنىن انىقتادى. ءبىر كۇننەن كەيىن ارىپتەسىنىڭ ايەلى بۇل جايتقا ونىڭ قاتىسى بارىنا كۇدىكتەنىپ, پوليتسياعا حابارلايمىن دەپ قورقىتقان.
سوتتالۋشى ۇرلىعى ءۇشىن قىلمىستىق جاۋاپكەرشىلىككە تارتىلۋدان قورقىپ, پىشاق الىپ, ارىپتەسىنىڭ ۇيىنە كەلگەن. ول ءبىرىنشى ارىپتەسىنىڭ ايەلىن كەزدەستىرىپ, وعان پىشاق سۇققان. سوسىن قىلمىسكەر ولاردىڭ قىزىن دا ولتىرگەن. سودان كەيىن قاسكۇنەم جاتىن بولمەگە بەت الىپ, وندا وتاعاسى ۇيىقتاپ جاتقانىن بايقاعان. ونىڭ دارمەنسىزدىگىن پايدالانىپ, ونى دا ولتىرگەن. بارلىق فاكتىلەردى ەسكەرە وتىرىپ, پروكۋرور سوتتالۋشىنى ايىپتاۋدىڭ بارلىق باپتارى بويىنشا كىنالى دەپ تانۋدى جانە ونى ءومىر بويىنا باس بوستاندىعىنان ايىرۋدى سۇرادى. سوت سوتتالۋشىنى كىنالى دەپ تاپتى.
«سوت ۇكىمىمەن ل. ايىپتاۋدىڭ بارلىق باپتارى بويىنشا كىنالى دەپ تانىلىپ, ءومىر بويىنا سوتتالدى. جازانىڭ العاشقى 5 جىلىن قىلمىستىق-اتقارۋ جۇيەسىنىڭ تولىق قاۋىپسىز مەكەمەسىندە وتەيدى. ءىس بويىنشا جەڭىلدەتەتىن جانە اۋىرلاتاتىن ءمان-جاي جوق. سوت جازا تاعايىنداۋ كەزىندە جاسالعان قىلمىستىڭ اۋىرلىعى مەن ءمان-جايى, ءۇش ادامنىڭ ءولىمىن, جابىرلەنۋشى تاراپتىڭ ۇستانىمىن جانە سوتتالعان ادامنىڭ ءىس-ارەكەتكە قاتىناسى, ياعني وكىنبەگەنىن ەسكەردى», دەپ حابارلادى قاراعاندى وبلىسى پمك ءباسپاسوز قىزمەتى.
سونىمەن قاتار سوت جابىرلەنۋشى تاراپتىڭ سوتتالعاننان 15 000 000 تەڭگە كولەمىندە مورالدىق زياندى تولىق كولەمدە ءوندىرىپ الۋ تۋرالى ازاماتتىق تالاپ ارىزىن قاناعاتتاندىردى. ۇكىم زاڭدى كۇشىنە ەنگەن جوق.
