ادام بالاسىنىڭ جۇرەگىندە قادىر تۇتىپ قۇرمەتتەيتىن ەڭ ۇلى ۇعىم – ۇستاز. «ۇستاز» دەگەن قازاق بالاسى ءۇشىن قاشاندا قاسيەتتى, قادىرلى ۇعىم بولعان. جاقسى جاندى كورگەندە «ۇستازى جاقسىنىڭ – ۇستامى جاقسى», «ۇستازدان تاربيە العان» نەمەسە «ۇستاز الدىن كورگەن» دەگەن سوزدەر ءجيى ايتىلادى. العاش ءارىپ تانىتىپ, ءومىردىڭ قىر-سىرىن بىلۋگە, سان قيلى قۇبىلىستارىن تەرەڭ تۇسىنۋگە مۇرىندىق بولىپ, جان دۇنيەڭە نۇرلى شۋاق ءتۇسىرىپ, ادامگەرشىلىككە باۋلىعان مۇعالىمنىڭ بەينەسى كوڭىل تورىنەن ورىن الارى انىق. ۇستاز ءار ادامنىڭ جانىنا ءبىلىم ءدانىن سەۋىپ, ءار شاكىرتىن بالاپانداي ايالاپ, ءومىر اتتى شەكسىز عالامعا توپشىسىن قاتايتىپ ۇشىرادى.
ا.فەرديناند: «كىسىنىڭ بويىنداعى ۇيرەنۋ قۇمارلىعىن وياتقان ادام, ەڭ جاقسى مۇعالىم» دەپ ناعىز مۇعالىمنىڭ كەلبەتىن كوز الدىمىزعا اكەلگەندەي.
بۇگىن قازاقستاننىڭ بارلىق مەكتەبىندە سوڭعى قوڭىراۋ ءراسىمى ەكى جىلدىق كارانتيننەن كەيىن ءداستۇرلى تۇردە وتەدى.
سالتاناتتى شارا مەكتەپ ءبىتىرۋشى تۇلەكتەر ءۇشىن تولعانىسى كوپ ەرەكشە ساتكە تولى. سەبەبى, وسىدان ون ءبىر جىل بۇرىن تارىداي بولىپ مەكتەپ تابالدىرىعىن اتتاعان بالعىندار تاۋداي بولىپ, التىن ۇياسىمەن قوشتاسۋدا.
