ماقالادا كورسەتىلگەندەي, شۇبارتاۋ ءوزى قوسىلعان اياگوز اۋدانىنىڭ ورتالىعىنان دا, سونداي-اق وبلىس ورتالىعىنان دا شالعاي جاتىر. تاراعان باسقا اۋداندار: ماقانشى, اقجار, سامار, شار اۋداندارى ورتالىقتارىنىڭ گەوگرافيالىق ورنالاسۋى شۇبارتاۋ اۋدانىنان وزگەرەك. سول سەبەپتى بۇل جەرلەردەن ادامداردىڭ قونىس اۋدارۋى كوپ بايقالعان جوق جانە وسى ارقىلى بۇرىنعى اۋدان ورتالىقتارىنىڭ كەلبەتى دە بۇزىلماي, ەجەلگى قالىپتارىن ساقتاپ قالدى دەۋگە بولادى. ال شۇبارتاۋدى اۋدان ورتالىعىمەن, باسقا دا ەلدى مەكەندەرمەن بايلانىستىراتىن جالعىز كوتەرمە جولدىڭ جاعدايى سىن كوتەرمەيتىن كۇيگە ءتۇستى. ونىڭ ۇستىنە, تەمىر جول قاتىناسى دا جوق بولعاندىقتان, ادامداردىڭ اۋدان ورتالىعىنا جەتۋى, ستۋدەنتتەردىڭ كەلىپ قايتۋى قيىنداپ كەتتى. وسىنىڭ ءوزى جەرگىلىكتى حالىقتىڭ اتاجۇرتىن تاستاپ, ۇدەرە كوشۋىنە اكەلىپ سوقتىردى. بوس قالعان قۇرىلىستار ءب ۇلىنىپ, ەلدى مەكەن سۇرەڭسىز قالىپقا ەندى. جوسپارسىز كوشكەن ادامدار دا كۇنكورىستىڭ اۋىرتپالىعىمەن بەتپە-بەت قالدى. كەزىندەگى جاعداي اۋداندار مەن وبلىستاردى ءبىر-بىرىنە قوسۋدى تالاپ ەتكەن دە بولار. دەگەنمەن 100% دەرلىك بايىرعى ۇلت ورنالاسقان شۇبارتاۋ, ابىرالى سياقتى اۋدانداردىڭ تاراتىلۋىن وڭ شەشىم بولدى دەپ ايتا الماساق كەرەك.
مەملەكەت باسشىسى قاسىم-جومارت توقاەۆتىڭ جاڭا قازاقستان قۇرۋ تۋرالى باستاماسىن كەزىندە جىبەرىلگەن قاتەلىكتەردى تۇزەتۋگە بەتبۇرىس دەپ تۇسىنەمىن. بۇگىندە ەلىمىزدىڭ الەۋمەتتىك-ەكونوميكالىق احۋالى دا وعان مۇمكىندىك بەرەدى عوي دەپ ويلايمىن. ال ۇلان-عايىر جەرى بار بۇرىنعى شۇبارتاۋ اۋدانىنىڭ جەرى مال شارۋاشىلىعىن وركەندەتۋگە وتە قولايلى. مۇنىڭ سىرتىندا, جەر قويناۋىنداعى قازبا بايلىقتارى دا جەتەرلىك. حالىق سانى از دەگەن جەلەۋدىڭ اۋداندى قايتا اشۋعا كەدەرگى كەلتىرە المايتىن ءۋاج ەكەنى كۇمانسىز.
امانگەلدى تىلەۋجانوۆ,
اياگوز اۋدانىنىڭ قۇرمەتتى ازاماتى
سەمەي
