كونفەرەنتسيا بارىسىندا وبلىستاعى قازاق ءباسپاسوزىنىڭ وتكەنى مەن بۇگىنى, اقپارات باسەكەسىندەگى ورنى, وڭىرلىك باسپاسوزدەگى اقپاراتتىق جانرلاردىڭ ەرەكشەلىگى, مۇحامەتجان سەراليننىڭ ءومىرى مەن قىزمەتى, بالالارعا ارنالعان وڭىرلىك باسىلىمداردىڭ جاي-كۇيى, تاجىك جانە قاراقالپاق ءباسپاسوزىنىڭ قالىپتاسۋىنداعى ۇلت اعارتۋشىلارىنىڭ ەڭبەگى سياقتى وزەكتى ماسەلەلەر ءسوز بولدى. جيىنعا قاتىسۋشىلاردى قۇتتىقتاعان قوعامدىق دامۋ باسقارماسىنىڭ وكىلى جانار تاس-
قايىرقىزىنىڭ ايتۋىنشا, وڭىردە 118 باق تىركەلگەن ەكەن, ونىڭ 42-ءسى قوعامدىق-ساياسي باعىتتاعى اقپارات قۇرالى بولىپ تابىلادى. ودان كەيىن «قوستاناي تاڭى» گازەتىنىڭ باس رەداكتورى جانۇزاق ايازبەكوۆ ءسوز الىپ, تاۋەلسىز ەل, دەربەس مەملەكەت بولۋ دەگەن ۇعىمداردى حالىقتىڭ وي-ساناسىنا ۇيالاتۋدا قازاق ءباسپاسوزىنىڭ ورنى وراسان زور بولعانىن ەرەكشە اتاپ ءوتتى.
– باسقاسىن ايتپاعاندا, وعان كۋا – وسىدان ءجۇز جىل بۇرىن شىققان «اۋىل» گازەتىنىڭ سارعايعان بەتتەرى. تاريحقا جۇگىنسەك, «اۋىل» گازەتىنىڭ العاشقى سانى 1922 جىلدىڭ 27 ماۋسىمىندا اراب قارپىمەن شىقتى. ول ۋاقىت تۇرمىس تاۋقىمەتىمەن قاتار, ول الەۋمەتتىك تەڭسىزدىك بەلەڭ الىپ تۇرعان كەزەڭ ەدى. «اۋىل» گازەتى وسى ءبىر كەلەڭسىز قۇبىلىستارعا قارسى كۇرەس اشتى. بۇل باسىلىم العاشقى سانىنان-اق, ەل مەن جەر, ءتىل مەن دىلگە نازار اۋدارىپ, ۇلتتىق قۇندىلىقتارعا قاتىستى ءتۇرلى ماسەلەلەردى كوتەرە ءبىلدى. «اۋىلدىڭ» ءىزباسارى «قوستاناي تاڭى» گازەتى دە وسى ۇردىستەن اينىماي ۇلتتىق مۇددە, مەملەكەتشىلدىك ماسەلەلەرىن ناسيحاتتاپ كەلەدى, – دەدى جانۇزاق ايازبەكوۆ.
قوستاناي ۋنيۆەرسيتەتىنىڭ پروفەسسورى قالقامان جاقىپ «ايقاپ» جۋرنالىندا كاسىبي كوسەمسوزشى م.سەرالينمەن قاناتتاسا ەل رۋحانياتىنا قىزمەت ەتكەن قالامگەرلەر تۋرالى تىڭ دەرەكتەرىمەن ءبولىستى. قالقامان حاسەن ۇلىنىڭ باستاۋىندا مۇحامەتجان سەراليندەي الىپ تۇلعا تۇرعان «قوستاناي تاڭى» گازەتىنىڭ ءجۇز جىلدىعىنا وراي, ارنايى جۋرناليستەر مۋزەيىن اشۋ تۋرالى ۇسىنىسى كوپشىلىك قولداۋىنا يە بولدى.
اتالعان كونفەرەنتسيادا ايتىلعان تاعى ءبىر اقجولتاي جاڭالىقتىڭ ءبىرى احاڭ ۋنيۆەرسيتەتىندەگى وسىدان بىرەر جىل بۇرىن جابىلىپ قالعان ء«بىلىم جارىسى» گازەتىنىڭ قايتا شىعا باستاۋى بولدى. ستۋدەنت-جاستارعا ارنالعان اتالعان باسىلىم 1998 جىلدان بەرى شىعادى.
– كەزىندە ء«بىلىم جارىسى» رەسپۋبليكالىق «قازاق» گازەتىنىڭ قوسىمشاسى رەتىندە شىعىپ تۇردى. سوڭعى ەكى جىل ىشىندە بەلگىلى سەبەپتەرگە بايلانىستى گازەت جۇمىسى توقتاپ قالعان ەدى. وسىدان ەكى اپتا بۇرىن وبلىستىق گازەتتىڭ ۇجىمىمەن كەزدەسۋ بارىسىندا ءبىز ء«بىلىم جارىسى» ەندى «قوستاناي تاڭى» گازەتىنىڭ قوسىمشاسى رەتىندە شىقسا دەگەن ۇسىنىس ايتتىق. بۇل ۇسىنىسىمىز وبلىستىق گازەتتىڭ باس رەداكتورى مەن ۋنيۆەرسيتەت باسشىلىعى تاراپىنان قولداۋ تاپتى. ەندى الداعى وقۋ جىلىنان باستاپ وقىرماندارعا وبلىستىق گازەتتىڭ قوسىمشاسى رەتىندە جول تارتادى دەگەن ءۇمىتىمىز بار, – دەدى عىلىمي كونفەرەنتسيانىڭ مودەراتورى, جۋرناليستيكا كافەدراسىنىڭ مەڭگەرۋشىسى, PhD دوكتور امانگەلدى شورەنتاەۆ.
قوستاناي وبلىسى
