2022 جىلدىڭ ساۋىرىندەگى جاعداي بويىنشا ەلىمىزدە ۇيالى بايلانىس وپەراتورلارىنىڭ 17 ملن ابونەنتى بار. بۇل كورسەتكىش ءبىر جىل بۇرىنعىمەن سالىستىرعاندا 5,7, ال ون جىل بۇرىنعىمەن سالىستىرعاندا 83,1 پايىزعا كوپ. سونداي-اق تىركەلگەن ينتەرنەتتىڭ 2,8 ملن قولدانۋشىسى بار.
«قازىردىڭ وزىندە بارلىق نارىقتىق فورماتسيانىڭ بەلسەندى تۇردە ونلاينعا اۋىسىپ جاتقانىن بايقايمىز. سوڭعى جىلدارى ونلاين تولەم كولەمى بىرنەشە ەسە ءوستى. ءبىرىنشى توقسان قورىتىندىسى بويىنشا سوما 19,1 ترلن تەڭگەگە جەتتى. ءبىر جىل بۇرىنعىدان ءبىر جارىم ەسە جوعارى. ونىڭ ۇستىنە 2022 جىلدىڭ ءبىر توقسانىندا جاسالعان ونلاين تولەمدەر بۇكىل 2019 جىلعى كورسەتكىشتەن 43 پايىزعا ارتىق; 2018 جىلعىدان 28 ەسە كوپ. بۇل ديناميكا – بۇكىل الەمدىك ترەند. Nasdaq مالىمەتىنشە, 2040 جىلعا تامان ساتىپ الۋلاردىڭ 95 پايىزى ينتەرنەت ارقىلى جۇزەگە اسىرىلادى», دەپ جازادى Ranking پورتالى.
ونلاين تولەم ءوز كەزەگىندە ەلەكتروندى ساۋداعا سەرپىن بەرەدى. 2018-2019 جىلدارى e-Trading ۇلەسى 2,9 جانە 3,8 پايىز بولسا, 2020 جىلى بۇل كورسەتكىش 3 ەسە ارتىپ, 9,7 پايىزعا جەتتى. ال ينتەرنەت ارقىلى ساۋدا جاساعان پايدالانۋشىلار دەرەگىن قارار بولساق, ولاردىڭ ۇلەسى 2019 جىلعى 15,6 پايىزدان 2020 جىلى 17,7 پايىزعا كوتەرىلگەن.
قازىر ينتەرنەت ارقىلى كەز كەلگەن تاۋاردى ساتىپ الۋعا مۇمكىندىك بار. ونىڭ ىشىندە ازىق-ت ۇلىك, كيىم-كەشەك, كىتاپ, تۇرمىستىق تاۋارلار, ءدارى-دارمەك, تەلەكوم قىزمەتتەرى, ودان بولەك ساقتاندىرۋ, قارجىلىق قىزمەتتەر دە بار. ساتىپ الۋدى ۇيدە وتىرىپ جاساۋ ءارى ۋاقىتتى ۇنەمدەيدى, ءارى قاۋىپسىزدىك جاعىنان دا ءتيىمدى. ءتىپتى سوڭعى كەزدەرى اۆتوكولىكتى دە ۇيدە وتىرىپ ساتىپ الۋ مۇمكىندىگى قاراستىرىلا باستادى. بۇعان اۆتوديلەرلەردىڭ وزدەرى دە مۇددەلى. سونداي-اق كەيبىر قۇرىلىس كومپانيالارى جىلجىمايتىن م ۇلىكتى ونلاين ساتۋ ماسەلەسىن كۇن تارتىبىنە شىعاردى. پاتەر تاڭداۋ, انكەتا تولتىرۋ, پاتەردى برونداۋ, كەلىسىمشارتقا قول قويۋ, تولەم جاساۋ – ءبارى ونلاين.
