وسىلايشا, جىل باسىنان بەرى حالىقتىڭ بانكتەردەگى سالىمى 2,2 پايىزعا نەمەسە 312,1 ملرد تەڭگەگە ازايىپ قالعان. قازاقستاندىقتار اقشاسىنىڭ نەگىزگى بولىگىن ءداستۇرلى تۇردە شۇعىل دەپوزيتتەردە ساقتايدى. ونىڭ كولەمى قازىر 9,71 ترلن تەڭگەنى قۇرايدى, جىل باستالعالى 2,2 پايىزعا ازايىپتى (2022 جىلدىڭ 1 قاڭتارىندا 9,93 ترلن تەڭگە بولعان).
كولەمى بويىنشا كەلەسى ورىندا تالاپ ەتۋگە دەيىنگى دەپوزيتتەر مەن اعىمداعى شوتتار تۇر – 2,28 ترلن تەڭگە (-5 پايىز) جانە جيناقتاۋشى دەپوزيتتەر – 1 ترلن تەڭگەدەن اسادى (+2,8 پايىز). شارتتى دەپوزيتتەردەگى اقشا كولەمى 9,7 پايىزعا, 4,5 ملرد تەڭگەدەن 4,06 ملرد تەڭگەگە دەيىن تومەندەگەن.
سونداي-اق ازاماتتاردىڭ كوبى سالىمىن تەڭگەمەن ساقتاعاندى ءجون كورەدى. قازىرگى كەزدە 8,3 ترلن تەڭگە ۇلتتىق ۆاليۋتامەن, 4,7 ترلن تەڭگە شەتەل ۆاليۋتاسىمەن ساقتاۋلى تۇر. سوڭعى ۋاقىتتارى قازاقستاندا تەڭگەلەي دەپوزيتتەر بويىنشا ستاۆكا ۇلعايدى. بۇل بازالىق مولشەرلەمەنىڭ 13,5-تەن 14 پايىزعا دەيىن جوعارىلاۋىمەن بايلانىستى.
سالىم جيناۋ جاعىنان 22 بانكتىڭ 18-ىندە ءوسىم بار. ەكىنشى دەڭگەيلى بانكتەر ىشىندە جىلدىق ءوسىم تۇرعىسىنان كوش باسىندا Bank RBK (351 ملرد تەڭگە), «وتباسى بانك» (2,09 ترلن تەڭگە) جانە Altyn Bank (211,3 ملرد تەڭگە) قارجى ينستيتۋتتارى تۇر. جالپى, دەپوزيت پورتفەلىندەگى جەكە تۇلعا سالىمدارىنىڭ ۇلەسى 51 پايىزعا جەتكەن.
