قر باس سانيتارلىق دارىگەرى - دەنساۋلىق ساقتاۋ ۆيتسە-ءمينيسترى ايجان ەسماعامبەتوۆانىڭ ايتۋىنشا, مەملەكەتتىك شەكارا ارقىلى وتكىزۋ ورىندارىندا سانيتارلىق-كارانتيندىك باقىلاۋ جۇرگىزىلىپ جاتىر, ونىڭ ىشىندە قاشىقتان تەرمومەتريا بار.
مايمىلشەشەك (monkeypoxes – MPXV) – سيرەك كەزدەسەتىن جۇقپالى اۋرۋ. قىزبا, جالپى ينتوكسيكاتسيا جانە ەكزانتەمانىڭ پايدا بولۋىمەن سيپاتتالادى (قىزارۋ). ينكۋباتسيالىق كەزەڭ – 5-21 كۇن. ناۋقاستا دەنە قىزۋىنىڭ جوعارىلاۋى, دەنەنىڭ اۋىرۋى, السىزدىك, بورتپە, قۇسۋ, ليمفا تۇيىندەرىنىڭ ۇلعايۋى, باس اينالۋى بايقالادى. اۋرۋدىڭ ۇزاقتىعى 2-3 اپتا.
مايمىلشەشەك اۋرۋىن پريماتتار مەن كەمىرگىشتەر (تيىندەر) سياقتى جابايى جانۋارلار تاراتادى. سونداي-اق ينفەكتسيا ناۋقاستىڭ قانى نەمەسە ونىڭ بيولوگيالىق سۇيىقتىعى ارقىلى, اۋرۋ جانۋاردىڭ ەتىن قولدانۋ سالدارىنان جۇعۋى مۇمكىن. مايمىل شەشەگى اۋرۋى بۇگىندە باتىس افريكا ەلدەرىندە كەڭ تارالعان (كونگو دەموكراتيالىق رەسپۋبليكاسى, كونگو رەسپۋبليكاسى, كامەرۋن, ورتالىق افريكا رەسپۋبليكاسى, نيگەريا, كوت-د ' يۆۋار, ليبەريا, سەررا-لەونە, گابون جانە وڭتۇستىك سۋدان).
افريكادا سىرقاتتار سانى تەز وسۋدە. رەسمي اقپارات كوزدەرىنە سايكەس 2016 جىلدان باستاپ 20 ەسەگە كوبەيدى. ەڭ ۇلكەن وشاقتار نيگەريا مەن كونگودا تىركەلدى.
