پىكىر • 23 مامىر، 2022

ونەر ادامدارىن القالاۋ كەرەك

717 رەت كورسەتىلدى

مەملەكەت باسشىسى قاسىم-جومارت توقاەۆتىڭ «قازاقستان­نىڭ حالىق ءارتىسى» اتاعىن قايتارۋى – كوپتەن كۇت­كەن ۇيعارىم بولدى. مەن بۇل ماسە­لەنى ءبىراز ۋاقىتتان بەرى قوزعاپ ءجۇر­دىم. جالپى، ونەر ادامى القالاپ، قوشە­مەت-قۇرمەت كورسەتكەندى ۇناتاتىن قاۋىم. ولار سول قولپاشتاۋ ارقىلى ەڭبە­گىنىڭ باعالانعانىن سەزىنەدى، شىعار­ما­شىلىق تىنىسى كەڭەيەدى.

بۇرىن ونەر اتاقتارىنا ورىنسىز تەجەۋلەر بولدى. «قايراتكەر» دەگەندى شىعاردى. ونى، شىنىن ايتقاندا، جۇرت­تىڭ بارىنە بەرەتىن بولدى. ءبىزدىڭ ۇلت­تىڭ مەنتاليتە­تى­نە ساي ونەرگە بەرى­لەتىن اتاقتارعا ۇيرەنگەنبىز. ول سولاي بولۋ كەرەك دەپ ويلايمىن. اينا­لامىزداعى تمد ەلدەرىنىڭ بارىندە دە «حالىق ءارتىسى» اتاعى بار. ال بىزدە ءجونسىز الىنىپ تاستالدى. سوسىن ءبارى بەي­بەرەكەت «قايراتكەر» اتاندى. اقي­قاتىندا، ەلگە ەڭبەك ەتىپ جۇرگەن ءبىز ءبارىمىز قايراتكەرمىز. بىراق ناق­تى قاي سالانىڭ قايراتكەرىمىز؟.. سوندىقتان اسىرەسە، ونەر جاساپ جۇر­گەن شىعارماشىل جاندارعا «قا­زاقستاننىڭ حالىق ءارتىسى» اتا­عى­نىڭ قايتارىلۋى وتە ورىندى. ال «قايراتكەرلىكتى» وڭتايلاپ، ءوزىنىڭ دەڭگەيىمەن لايىقتى ءوز ادامدارى­نا بەرۋ كەرەك. ياعني پروديۋسەرلەرگە، ۇيىمداستىرۋشىلارعا، تاعى باسقا دا ونەر ادامدارىنىڭ اينالاسىندا جۇرگەن جاندارعا ۇلكەن ەڭبەگى ءۇشىن «قايراتكەر» اتاعىن ­بەرۋگە بولادى.

وسى ورايدا «حالىق ءارتىسى» اتا­عى­مەن قوسا «ەڭبەك سىڭىرگەن ءارتىسى» دە­گەندى دە قوسۋ كەرەك دەگەن ۇسى­نىسىم بار. بۇل ساناتقا جاق­سى جۇمىس­تارىمەن ەلگە تانىمال بولىپ قالعان ءانشى، مۋزىكانت، اكتەر­لەردى كىرگىزسە بولادى. ياعني بۇل اتاق جاستارعا شىعارماشىلىق قولداۋ رەتىندە جۇزەگە اسپاق. بۇل ونىڭ ودان كەيىن دە جۇلدىزداي جار­قىراي تۇسۋىنە، تىنباي ەڭبەك ەتۋىنە سەرپىن بولادى. ال «حالىق ءارتىسى» اتا­عىنىڭ ءجونى دە، جولى دا بولەك. ارينە، وعان قازاق ونەرىنىڭ دامۋىنا وراسان زور ۇلەس قوسقان، تۇلعا­لىق قاسيەتكە جەتكەن ونەر ادامدارى لايىق.

قاسىم-جومارت توقاەۆ بۇل شە­شى­مى دۇرىس شەشىم بولدى. ونەر ادام­­دارىن زالدا وتىرىپ دۋ قول شاپا­لاق­تاعانداي القا­لاپ، ار­قا­سىنان قاعۋ كەرەك. مۇن­داي ماراپاتتار، ەڭ ال­دى­مەن ونەر ادام­دارىنىڭ ەڭبە­گىن ەلەۋ­دى بىل­دىرەدى. سونداي-اق ول شىعار­ما­شى­لىقتىڭ كەڭ قانات جايۋى­نا، بيىكتەپ ۇشۋىنا تالپىندىرادى.

 

تۇڭعىشباي جامانقۇلوۆ،

قازاقستاننىڭ حالىق ءارتىسى

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

سوفيادان ولجالى ورالدى

سپورت • بۇگىن، 08:40

جاس تەننيسشىلەر جارادى

تەننيس • بۇگىن، 08:32

تۇتىنۋشى قۇقىعىن قورعايدى

قازاقستان • بۇگىن، 08:27

ۇقساس جاڭالىقتار