بەينەكونفەرەنتسيا بايلانىسى رەجىمىندەگى وتىرىسقا ازەربايجان ۇكىمەتىنىڭ باسشىسى الي اسادوۆ, بەلارۋس ۇكىمەتىنىڭ باسشىسى رومان گولوۆچەنكو, قىرعىزستان ۇكىمەتىنىڭ باسشىسى اقىلبەك جاپاروۆ, رەسەي ۇكىمەتىنىڭ باسشىسى ميحايل ميشۋستين, تاجىكستان ۇكىمەتىنىڭ باسشىسى كوحير راسۋلزودا, وزبەكستان ۇكىمەتىنىڭ باسشىسى ابدۋللا اريپوۆ, سونداي-اق ارمەنيا ۆيتسە-پرەمەرى مگەر گريگوريان, تۇرىكمەنستان مينيسترلەر كابينەتى توراعاسىنىڭ ورىنباسارى مۋحاممەتگۋلى مۋحاممەدوۆ جانە تمد اتقارۋشى كوميتەتىنىڭ توراعاسى سەرگەي لەبەدەۆ قاتىستى.
ءاليحان سمايىلوۆ قازاقستان رەسپۋبليكاسى ءۇشىن وسى جىلى تاۋەلسىز مەملەكەتتەر دوستاستىعىنا توراعالىق ەتۋ ۇلكەن قۇرمەت ەكەنىن اتاپ ءوتتى.
«بىلتىر ءبىز ۇيىمنىڭ 30 جىلدىعىن اتاپ وتتىك. تمد قىزمەتىنە وڭ باعا بەرىلدى. ۇيىمنىڭ ساياسي ديالوگتى قولداۋ, ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىلدى كەڭەيتۋ بويىنشا ايماقتىق الاڭ رەتىندە لايىقتى بەدەلگە يە بولعانى ايتىلدى. بۇگىندە تمد ەلدەرىمىز اراسىنداعى ىنتىماقتاستىقتى قولداۋدا ماڭىزدى ءرول اتقارىپ كەلەدى», دەدى قازاقستان پرەمەر-ءمينيسترى.
وتىرىس بارىسىندا ۇكىمەت باسشىلارى ەكونوميكالىق ىنتىماقتاستىقتىڭ وزەكتى ماسەلەلەرى بويىنشا پىكىر الماستى. ءاليحان سمايىلوۆ ءوز سوزىندە قازاقستاننىڭ توراعالىق ەتۋ اياسىنداعى باسىم مىندەتتەرىنىڭ ءبىرى ءوزارا ساۋدا كولەمىن ۇلعايتۋ جانە ونى ءارتاراپتاندىرۋ ەكەنىن اتاپ ءوتتى.
«بۇعان ءبىزدىڭ مۇمكىندىكتەرىمىز جەتەدى. وتكەن جىلى قازاقستاننىڭ تمد مەملەكەتتەرىمەن ءوزارا ساۋدا كولەمى 32,8 ملرد دوللاردى قۇرادى, بۇل 2020 جىلمەن سالىستىرعاندا 30,2%-عا ارتىق. بيىلعى ءۇش ايدىڭ قورىتىندىسى بويىنشا قازاقستان مەن تمد ەلدەرى اراسىنداعى تاۋار اينالىمى شامامەن 7,5 ملرد دوللاردى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 16,3%-عا ارتىق», دەدى ءا.سمايىلوۆ.
ونەركاسىپ كووپەراتسياسىن ودان ءارى دامىتۋ تۋرالى ايتقان قازاقستان ۇكىمەتىنىڭ باسشىسى تمد ەلدەرىنىڭ باسەكەلى ارتىقشىلىقتارىن تولىق ىسكە اسىرۋ قاجەت ەكەنىنە نازار اۋداردى.
ء«بىز ونەركاسىپ كووپەراتسياسىنىڭ ماڭىزدى باعىتتارىنىڭ تىزبەسىن ايقىندادىق. جاڭا كووپەراتسيالىق بايلانىستاردى قۇرۋ جانە قولدانىستاعىلارىن دامىتۋ مۇمكىندىكتەرى قاراستىرىلىپ جاتىر. اتقارىلىپ جاتقان جۇمىس تمد-عا مۇشە مەملەكەتتەردىڭ ەكونوميكالارىنىڭ تۇراقتىلىعىن ارتتىرۋعا جول اشادى», دەدى پرەمەر-مينيستر.
سونىمەن قاتار ءا.سمايىلوۆ تمد-نىڭ 2030 جىلعا دەيىنگى ەكونوميكالىق ىنتىماقتاستىق ستراتەگياسىنىڭ مىندەتتەرىنىڭ ءبىرى شاعىن جانە ورتا كاسىپكەرلىك سۋبەكتىلەرى اراسىندا ىسكەرلىك بايلانىستار ورناتۋ مەن دامىتۋعا جاردەمدەسۋ ەكەنىن ەسكە سالدى. وسىعان بايلانىستى ۇكىمەت باسشىسىنىڭ ايتۋىنشا, 1998 جىلى قابىلدانعان تمد مەملەكەتتەرىندەگى شاعىن كاسىپكەرلىكتى قولداۋ جانە دامىتۋ باعدارلاماسىنىڭ ەرەجەلەرىن وزەكتەندىرۋ قاجەت. بۇعان قوسا پرەمەر-مينيستر الەمدەگى داعدارىس جاعدايلارى ازىق-ت ۇلىك نارىعىنا تەرىس اسەر ەتىپ وتىرعانىن اتاپ ءوتتى. ماسەلەن, بۇۇ فاو دەرەكتەرىنە سايكەس الەمدەگى ازىق-ت ۇلىك باعاسىنىڭ يندەكسى بىلتىرعى ساۋىرمەن سالىستىرعاندا, بيىل ءساۋىر ايىندا 30%-عا جوعارىلاعان. ازىق-ت ۇلىك قاۋىپسىزدىگى پروبلەمالارىن شەشۋ ءۇشىن ءا.سمايىلوۆ كەزەڭ-كەزەڭىمەن كەشەندى ەكونوميكالىق ۇيىمداستىرۋ شارالارىن ىسكە اسىرۋعا, اتاپ ايتقاندا, اگرارلىق نارىقتاردا, ونىڭ ىشىندە بىرلەسكەن ازىق-ت ۇلىك تەڭگەرىمىن ازىرلەۋ جانە جۇرگىزۋ ارقىلى نەگىزسىز مەملەكەتارالىق باسەكەلەستىكتى تومەندەتۋگە; اۋىل شارۋاشىلىعىندا ينۆەستيتسيالىق-يننوۆاتسيالىق جوبالاردى جۇزەگە اسىرۋ ءۇشىن مەملەكەتارالىق بىرلەستىكتەردى نەمەسە بىرلەسكەن كاسىپورىنداردى قۇرۋعا; وتپەلى تاۋار وتكىزۋ جۇيەسىن دامىتۋعا شاقىردى.
سونداي-اق ءوز سوزىندە پرەمەر-مينيستر كليماتتىڭ وزگەرۋى جانە كيبەرقاۋىپسىزدىك قاۋپى ماسەلەلەرىنە توقتالدى.
«قازىرگى سىن-تەگەۋرىندەر ولاردى ەڭسەرۋ جولىندا ۇيلەستىرىلگەن جانە بىرلەسكەن شارالاردى قابىلداۋدىڭ ماڭىزدىلىعىن كورسەتتى. بۇل ورايدا دوستاستىقتىڭ ەكونوميكالىق جانە باسقارۋ قۇرالدارىنىڭ الەۋەتى ەڭ اۋقىمدى مىندەتتەردى تابىستى شەشۋگە مۇمكىندىك بەرەتىنىن اتاپ وتكىم كەلەدى», دەدى ءا.سمايىلوۆ.
وتىرىس قورىتىندىسى بويىنشا بىرقاتار قۇجاتقا, سونىڭ ىشىندە بيولوگيالىق ماتەريالمەن الماسۋ تۋرالى كەلىسىمگە, 1995 جىلعى 3 قاراشاداعى تمد-عا قاتىسۋشى مەملەكەتتەردىڭ ورتاق عىلىمي-تەحنولوگيالىق كەڭىستىگىن قۇرۋ تۋرالى كەلىسىمگە وزگەرىستەر ەنگىزۋ تۋرالى حاتتاماعا, ءجۇزىم شارۋاشىلىعى مەن شاراپ جاساۋدى ودان ءارى دامىتۋ جونىندەگى تمد-عا قاتىسۋشى مەملەكەتتەر ىنتىماقتاستىعىنىڭ تۇجىرىمداماسى جانە ونى ىسكە اسىرۋ جونىندەگى نەگىزگى ءىس-شارالار جوسپارى تۋرالى, تمد-عا قاتىسۋشى مەملەكەتتەردىڭ اۋىل شارۋاشىلىعى جانۋارلارىن مولايتۋ كەزىندە گەنەتيكالىق ماتەريالدىڭ بيولوگيالىق قاۋىپسىزدىگىن قامتاماسىز ەتۋ جونىندەگى 2026 جىلعا دەيىنگى بىرلەسكەن ءىس-قيمىل كەشەنى تۋرالى, تمد-عا قاتىسۋشى مەملەكەتتەردىڭ اقپاراتتىق قاۋىپسىزدىگىن قامتاماسىز ەتۋدىڭ 2030 جىلعا دەيىنگى كەزەڭگە ارنالعان ستراتەگياسىن ىسكە اسىرۋ جونىندەگى ءبىرىنشى كەزەكتەگى ءىس-شارالار جوسپارى تۋرالى, «تمد جاستار استاناسى» حالىقارالىق جوباسى تۋرالى, پەرسپەكتيۆالى عىلىمي جوبالاردىڭ تىزبەسى تۋرالى شەشىمدەرگە جانە ت.ب. قول قويىلدى.
ۇكىمەت باسشىلارى كەڭەسىنىڭ كەلەسى وتىرىسى 2022 جىلعى قاراشادا نۇر-سۇلتان قالاسىندا وتەدى.
