قوعام • 21 مامىر، 2022

الماتىدا جول جوندەۋ جۇمىستارىنا 16 ملرد تەڭگە جۇمسالماق

بيىل مەگاپوليستە ۇزىندىعى 221 شاقىرىم بولاتىن 224 كوشە جولدارىنا ورتاشا جوندەۋ جۇرگىزۋ جوسپارلانىپ وتىر، دەپ حابارلايدى Egemen.kz. بۇل تۋرالى الماتى قالالىق موبيلدىلىك باسقارماسىنىڭ باسشىسى عاني مىرزاحانوۆ ءمالىم ايتتى.

Egemen Qazaqstan

«الماتى قالاسىندا كوشە-جول جەلىسىنىڭ ۇزىندىعى - 3096 شاقىرىم، ونىڭ 234 شاقىرىمىندا قاتتى جابىن جوق. جاقسى جانە قاناعاتتانارلىق جاعدايداعى جولدار ۇلەسىنىڭ كورسەتكىشىن 95%-عا دەيىن جاقسارتۋ ءۇشىن 2025 جىلعا قاراي 234 كم جاڭا جول سالۋ، ۇزىندىعى كەمىندە 200 كم جولدارعا جىل سايىن ورتاشا جوندەۋ جانە قالانىڭ بارلىق كوشە-جول جەلىسىن قامتي وتىرىپ، 350 مىڭ شارشى مەتر اسفالتبەتون جابىنىنا اعىمداعى جوندەۋ جۇرگىزۋ جوسپارلانىپ وتىر»، دەدى باسقارما باسشىسى.

عاني مىرزاحانوۆ قازىرگى ۋاقىتتا قالانىڭ «العاباس»، «المەرەك» جانە «قايرات» شاعىن اۋداندارىندا جۇمىستار جالعاسىپ جاتقانىن اتاپ ءوتتى.

«سونىمەن قاتار، «اقجار» شاعىن اۋدانىندا ۇزىندىعى 48 كم جاڭا جولداردىڭ قۇرىلىسى باستالدى. «قايرات» جانە «المەرەك» شاعىن اۋداندارى بويىنشا جۇمىستار ەنەرگوتيىمدىلىك جانە ينفراقۇرىلىمدىق دامۋ باسقارماسىمەن كەلىسە وتىرىپ، ينجەنەرلىك جەلىلەر قۇرىلىسىنىڭ اياقتالۋىنا قاراي جۇرگىزىلۋدە.

«العاباس» شاعىن اۋدانى بويىنشا جۇمىستار اعىمداعى ايدىڭ سوڭىنا دەيىن جالعاسادى، جىل سوڭىنا دەيىن تاعى 9 كم جول سالۋ جوسپارلانعان. جول جۇمىستارى ەنەرگيا تيىمدىلىگى جانە ينفراقۇرىلىمدىق دامۋ باسقارماسىمەن ۇيلەستىرە وتىرىپ، ينجەنەرلىك جەلىلەر قۇرىلىسىنىڭ اياقتالۋىنا قاراي ورىندالىپ جاتىر»، دەدى ول.

سپيكەردىڭ ايتۋىنشا، مەگاپوليستە بيىل ۇزىندىعى 221 كم بولاتىن 224 كوشەگە، ونىڭ ىشىندە ۇزىندىعى 56،9 كم بولاتىن قالانىڭ 19 ماگيسترالدى كوشەسىنە ورتاشا جوندەۋ جۇرگىزىلمەك.

«سونداي-اق، «اقبۇلاق»، «دارحان»، «قاراسۋ»، «تاستىبۇلاق»، «شۇعىلا» شاعىن اۋداندارداعى جولدار جوندەلەدى. ورتاشا جول جوندەۋ جۇمىستارىنا شامامەن 16 ملرد تەڭگە جۇمسالماق» ، دەدى عاني مىرزاحانوۆ.

ايانا توعانبەك

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز