ءبىلىم • 20 مامىر، 2022

اسكەري قىزمەتتەن وتكەن ۋنيۆەرسيتەت تۇلەكتەرى گرانتتى وتەۋدەن بوساتىلادى

41 رەت كورسەتىلدى

اسكەري بورىشىن وتەپ، «كادەت» سىنىبىن بىتىرگەن تۇلەكتەر ۋنيۆەرسيتەتكە گرانت الۋ ءۇشىن 5% كۆوتا بولىنەدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى Egemen.kz.

«كەشە قورعانىس مينيسترىمەن بىرگە مەكتەپتەردە اسكەري-پاتريوتتىق تاربيە بەرۋ، ەلىمىزدىڭ اسكەري جوعارى وقۋ ورىندارىندا كادرلاردى دايارلاۋ جانە اسكەري قىزمەتتىڭ تارتىمدىلىعىن ارتتىرۋ ماسەلەلەرىن تالقىلادىق. مەملەكەت باسشىسى اسكەري-پاتريوتتىق تاربيە بەرۋ جۇمىسىن ارتتىرۋدى تاپسىرعان بولاتىن. وسى ورايدا بۇل ءىس-شارالار پرەزيدەنتتىڭ تاپسىرماسىن جۇزەگە اسىرۋعا باعىتتالىپ وتىر. ەلىمىزدىڭ اسكەري قاۋىپسىزدىگىن قامتاماسىز ەتۋ، وتانسۇيگىشتىككە تاربيەلەۋ، جاستاردى العاشقى اسكەري دايارلىقتان وتكىزۋ جانە وفيتسەرلەر دايارلاۋ – ورتاق مىندەت. ال وسى باعىتتا ءبىزدىڭ مينيسترلىك وتە ماڭىزدى ءرول اتقارادى. وسىعان بايلانىستى بىرقاتار ۇسىنىستى قولعا الدىق»، دەپ جازدى مينيستر ءوزىنىڭ Facebook پاراقشاسىنا.

ونىڭ ايتۋىنشا، مەرزىمدى اسكەري قىزمەتتى وتكەرۋدىڭ تارتىمدىلىعىن ارتتىرۋ ءۇشىن اسكەري بورىشىن وتەگەن جانە «كادەت» سىنىبىن بىتىرگەن تۇلەكتەرگە گرانت الۋ ءۇشىن 5% كۆوتا ءبولۋ ۇسىنىلدى. بۇل جىل سايىن 3 000-نان استام گرانت.

«ونىڭ ۇستىنە ۋنيۆەرسيتەت تۇلەكتەرى اسكەري قىزمەتتەن وتكەن جاعدايدا گرانتتى 3 جىل بويى وتەۋ مەرزىمىنەن بوساتىلادى. قازىر مەملەكەت ەسەبىنەن وقىعانداردىڭ بارلىعىنا ونى وتەۋ تالابى قويىلاتىنىن ەسكە سالا كەتەيىن. بۇل وقۋعا تۇسۋشىلەردى ىنتالاندىرىپ، اسكەري قىزمەتكە دەگەن قىزىعۋشىلىقتى ارتتىرادى دەپ ويلايمىن. ۇشىنشىدەن، ءبىز اسكەري قىزمەتتە نەمەسە بىتىمگەرشىلىك جانە باسقا دا ارنايى وپەراتسيالارعا قاتىسىپ، قازا تاپقان اسكەري قىزمەتشىلەردىڭ بالالارىنا ۋنيۆەرسيتەتتەردە وقۋعا گرانتتار بەرۋ تۋرالى نورمانى ەنگىزۋدى ۇسىنىپ وتىرمىز»، دەپ قوستى اسحات ايماعامبەتوۆ.

سوڭعى جاڭالىقتار

ورال قوقىس استىندا قالۋى مۇمكىن

ايماقتار • بۇگىن، 16:47

دوللار قايتا قىمباتتادى

قارجى • بۇگىن، 15:58

ۇقساس جاڭالىقتار