سونداي-اق جاڭا ارنايى ەكونوميكالىق ايماقتار قۇرۋعا موراتوري ەنگىزۋ, بەيىندى ەمەس باعىتتاردى قىسقارتۋ, سونداي-اق قايتا ءبولۋ دەڭگەيى بويىنشا وڭدەۋشى ونەركاسىپ شەڭبەرىندە قىزمەتتىڭ باسىم تۇرلەرىنىڭ جەكە تىزبەسىن قالىپتاستىرۋدى ۇسىندى.
كوميتەت توراعاسى سەرىكباي ترۇموۆ دوڭگەلەك ۇستەل وتىرىسىن اشا كەلىپ, ارنايى ەكونوميكالىق ايماقتاردىڭ قۇرىلۋ سەبەبىنە توقتالدى. قازىرگى زامانداعى ونىمدىلىگى جوعارى, باسەكەگە قابىلەتتى وندىرىستەردى جەدەل دامىتۋ, قىزمەت ساپاسىنىڭ جاڭا دەڭگەيىن قالىپتاستىرۋ, ينۆەستيتسيالار تارتۋ, سالالار مەن وڭىرلەرگە جاڭا تەحنولوگيالار ەنگىزۋ, سونداي-اق حالىقتى جۇمىسپەن قامتۋ ماقسات ەتىلگەنىن جەتكىزدى.
قارجى ءمينيسترىنىڭ ورىنباسارى مارات سۇلتانعازيەۆ اەا قىزمەتىنىڭ تيىمدىلىگىن تالقىلاۋ بارىسىندا بايانداما جاسادى. ول بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى ارنايى ەكونوميكالىق ايماقتاردىڭ قىزمەتىنە اۋديت جۇرگىزگەنىن, وندا ينفراقۇرىلىمنىڭ اياقتالماعانى, ونەركاسىپكە ينۆەستيتسيالار تارتۋ دەڭگەيىنىڭ تومەندىگى جانە ءوندىرىس كولەمىنىڭ ازدىعى جونىندە بىرقاتار جۇيەلى كەمشىلىك پەن زاڭ تارماعىنىڭ بۇزىلعانى انىقتالعانىن ايتتى.
سونىمەن قاتار يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى مارات قاراباەۆ, ەنەرگەتيكا ءمينيسترىنىڭ ءبىرىنشى ورىنباسارى مۇرات جۇرەبەكوۆ, سونداي-اق «يننوۆاتسيالىق تەحنولوگيالار پاركى» اەا باس ديرەكتورى ولجاس سارتاەۆ بايانداما جاسادى.
سەناتورلار دوڭگەلەك ۇستەل جۇمىسىنىڭ قورىتىندىسى بويىنشا ۇكىمەتكە جىبەرىلەتىن ۇسىنىستار ازىرلەدى. سەرىكباي ترۇموۆ ينۆەستيتسيالار كولەمىنە, اەا اۋماعىنداعى قىزمەت تۇرلەرىنىڭ باسىمدىعىنا بايلانىستى جەڭىلدىكتەر بەرۋ كەزىندە سارالانعان ءتاسىل ماسەلەسىن پىسىقتاۋ قاجەتتىگىن اتاپ ءوتتى. سونداي-اق بارلىق وبەكتى پايدالانۋعا بەرىلگەننەن كەيىن اەا قاتىسۋشىلارىنا جەر الاڭىن ساتىپ الۋ مۇمكىندىگىن بەرۋدىڭ, ارالاس ءتاسىلدى ەنگىزۋدىڭ ماڭىزدى ەكەنى جانە باسقا دا ماسەلەلەر ايتىلدى.
