ەستەرىڭىزدە بولسا, وتكەن سەنبىدە بۋففالو قالاسىنداعى Tops Friendly Market سۋپەرماركەتىندە بەلگىسىز بىرەۋ دۇكەندەگىلەرگە وق جاۋدىرعان بولاتىن. سونىڭ سالدارىنان 10 ادام قازا تاۋىپ, ۇشەۋى اۋىر جاراقاتتانعان. قۇربان بولعانداردىڭ 11-ءى قارا ءناسىلدى, قالعان ەكەۋى اق ءناسىلدى.
شاھار بيلىگى وقيعانى «وشپەندىلىك پەن ناسىلدىك نەگىزدەگى زورلىق-زومبىلىق ەكسترەميزمى» دەپ سيپاتتادى. قۇقىق قورعاۋ ورگاندارىنىڭ وكىلدەرى شابۋىل جاساعان سودىر ارنايى كيىم كيىپ, اۆتوماتتى قارۋمەن كەلگەنىن ايتتى. ول سۋپەرماركەت الدىندا ءتورت ادامدى اتىپ تاستاپتى. ونىڭ ۇشەۋى قازا تاپسا, بىرەۋى امان قالعان. سودان كەيىن ول سۋپەرماركەتكە كىرگەن. ءوزىن توقتاتپاق بولعان كۇزەتشىنى اتىپ تاستاعان. ءسويتىپ دۇكەندە ساۋدا جاساپ جۇرگەن تاعى 8 ادامعا وق جاۋدىرعان.
پەيتون گەندرون ەسىمدى سودىر كوپ ۇزاماي-اق قولعا ءتۇستى. جەرگىلىكتى پوليتسيانىڭ حابارلاۋىنشا, كۇدىكتى 18 جاستاعى اق ءناسىلدى. ول شابۋىلعا ابدەن دايىندالعان كورىنەدى. قارا ناسىلدىلەر مەكەندەگەن اۋدانعا كەلەر بۇرىن ارنايى اسكەري كيىم كيىپ, قارۋ-جاراعىن سايلاپ كەلگەن. ءتىپتى, باسىنا كيگەن كاسكاسىنا ۆيدەوكامەرا ورناتىپ, ارەكەتىن ونلاين ەفيردە كورسەتكەن.
بۋففالو مەرى بايرون براۋن قايعىلى جاعدايعا بايلانىستى پىكىر ءبىلدىردى. ونىڭ ايتۋىنشا, كەز كەلگەن قاۋىمداستىق مۇنداي وقيعامەن بەتپە-بەت كەلۋى مۇمكىن. ال ەري وكرۋگىنىڭ شەريفى دجون گارسيا سودىردىڭ ارەكەتىن ز ۇلىمدىققا بالادى.
قولعا تۇسكەن كۇدىكتى ءبىرىنشى دارەجەلى كىسى ءولتىردى دەگەن ايىپپەن جاۋاپقا تارتىلادى. سونداي-اق ونى كەپىلسىز قاماۋعا العان. الداعى اپتادا سوت وتىرىسى وتەدى.
وسى وقيعادان كەيىن نيۋ-يورك شتاتىنىڭ باس پروكۋرورى الەۋمەتتىك جەلى كومپانيالارىنىڭ كەي ادامنىڭ راديكالدانۋىنا قاتىستى تەرگەۋ باستادى. تەرگەۋ كەزىندە الەۋمەتتىك جەلىلەردىڭ وقيعانى ستريم جاساۋ, تاراتۋ نەمەسە جوسپارلاۋ ءۇشىن قانشالىقتى پايدالانىلاتىنىن زەردەلەمەك.
شتات گۋبەرناتورى بۋففالوداعى شابۋىلعا الەۋمەتتىك جەلىلەر كىنالى دەپ مالىمدەدى. تەحنولوگيالىق كومپانياعا سىن ايتۋشىلار ولاردىڭ قارۋلى قىلمىسكەردىڭ زورلىق-زومبىلىققا شاقىراتىن جازبالارىن جويۋعا اسىقپايدى دەپ كىنالادى.
«بۋففالوداعى تەررورلىق شابۋىل جەك كورۋشىلىكتى تاراتاتىن جانە ناسيحاتتايتىن ونلاين فورۋمداردىڭ اسەرى مەن قاۋپىن تاعى ءبىر رەت كورسەتتى», دەدى نيۋ-يورك شتاتىنىڭ باس پروكۋرورى لەتيتيا دجەيمس.
كۇدىكتى پەيتون گەندرون Google-دە مانيفەست جاريالاپ, Amazon-عا تيەسىلى Twitch-تە ارەكەتىن تىكەلەي ەفيردە كورسەتكەن. سوڭعىسى اتىس باستالعاننان كەيىن ەكى مينۋت ىشىندە ءستريمدى ءوشىرىپ تاستاعانى, ۆيدەونى جويۋعا تەز ارەكەت ەتكەنىن حابارلادى. الايدا وسى ەكى مينۋت ۆيدەونىڭ باسقا جەرگە تاراۋىنا جەتكىلىكتى بولدى.
كوپ ۇزاماي باسقا الەۋمەتتىك جەلىلەردە ۆيدەو قىزۋ تارالا باستادى. تۇپنۇسقا بەينەنىڭ ءۇزىندىسى Streamable دەپ اتالاتىن سايتتا جاريالانعان ەكەن. ونى سايتتان ءوشىرىپ تاستاعانعا دەيىن ءۇش ميلليوننان استام رەت قارالعان. بۇل بەينەنىڭ سىلتەمەسىن جۇرتتار تۇسىرىلىمنەن بىرنەشە ساعات وتكەن سوڭ Facebook پەن Twitter جەلىلەرى ارقىلى جاپپاي بولىسە باستادى.
بۋففالوداعى اتىستان كەيىن كوپ ۇزاماي-اق اقش پرەزيدەنتى قالاعا بارىپ, قازا تاپقاندارعا ارناپ گۇل شوقتارىن قويدى. وسى ءراسىم كەزىندە سويلەگەن سوزىندە اق ءۇي باسشىسى اق ناسىلدىلەردىڭ ۇستەمدىگىن ۋعا بالادى. سونداي-اق مۇنداي تۇسىنىكتى بيلىككە, ساياسي پايداعا ۇمتىلاتىنداردىڭ ارەكەتى دەپ مالىمدەدى.
«امەريكادا ز ۇلىمدىق جەڭبەيدى. بۇعان ۋادە بەرەمىن. وشپەندىلىك باسىم تۇسپەيدى جانە اق ۇستەمدىككە جول جوق. اقتاردىڭ ۇستەمدىگى دەگەن – ۋ. بۇل ۋ دەنەمىزدە جايىلىپ, ساياساتقا ءوتتى. كوز الدىمىزدا ىرىڭدەپ, تارالۋىنا جول بەرىلدى. ەندى وعان جول جوق. قايتالاپ ايتامىن, جول جوق. امەريكادا اق ناسىلدىلەردىڭ ۇستەمدىگى يدەولوگياسىنا ورىن جوق ەكەنىن بارىنشا انىق جانە كۇشپەن ايتۋىمىز كەرەك. ەشقاشان. مۇنى ايتپاۋ, ايىپتاماۋ سىبايلاسقا اينالدىرادى. ۇنسىزدىك – سىبايلاستىق. سىبايلاستىق. ءبىز ءۇنسىز قالا المايمىز», دەدى بايدەن.
ايتا كەتەرلىگى, كەيىنگى كەزدە جاۋىزدىق ارەكەتىن تىكەلەي ەفيردە تاراتۋ بەلەڭ الىپ بارادى. وسىدان ءۇش جىل بۇرىن جاڭا زەلاندياداعى كرايستچەرچ قالاسىندا سودىر ەكى مەشىتتە 51 ادامدى ءولتىرۋ ارەكەتىن Facebook-تە تىكەلەي ەفيردە تاراتقان ەدى. سول جىلدىڭ قازان ايىندا گەرمانياداعى سودىر جاپپاي اتىس ارەكەتىن Twitch-تە تىكەلەي ەفيردە تاراتقان.
