بۇگىندە كوللەدجدەردەگى ءبىلىم ساپاسىنا قاتىستى ايتىلاتىن سىن كوپ. الايدا جاستاردى جاڭا كاسىپكە باۋلۋدا, كاسىپتىك باعدار الىپ, جوعارى وقۋ ورنىنا دايىنداۋعا ۇلكەن ءمان بەرىلەتىن كاسىپتىك باعدارلى وقۋ ورىندارىنا زاماناۋي كەزەڭدە جاڭاشا كوزقاراس قالىپتاستىرۋ قاجەتتىگى ۋاقىت تالابىنان تۋىنداپ وتىر.
الماتى كوپسالالى كوللەدجىندە «مەنىڭ بولاشاق ماماندىعىم» تاقىرىبىمەن وتكەن فەستيۆال كاسىپتىك-تەحنيكالىق ءبىلىمدى ماماندار دايارلاۋدىڭ ماڭىزىن اشا ءتۇستى. بۇگىندە وڭتۇستىك استانادا 80-نەن استام كوللەدج بولسا, ايتۋلى ءىس-شاراعا 50-دەن استام كوللەدجدىڭ وقىتۋشىلارى مەن ستۋدەنتتەرى قاتىسىپ, قالا مەكتەپتەرى وقۋشىلارىنىڭ ساۋالدارىنا جاۋاپ بەردى.
تەحنيكالىق جانە كاسىپتىك ءبىلىم بەرۋ جۇيەسىنىڭ ونكۇندىگى شەڭبەرىندە قالالىق ءبىلىم باسقارماسى ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ ۇيىمداستىرۋىمەن وتكەن فەستيۆالدىڭ ماقساتى – ەڭبەك نارىعىندا سۇرانىسقا يە ماماندىقتاردى تاڭداۋ, ەلىمىز ەكونوميكاسىن دامىتۋ جولىندا مەكتەپ وقۋشىلارىن كاسىبي باعدار الۋعا شاقىرۋ, قولداۋ كورسەتۋ.
قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى تجكبب ءبولىم باسشىسى گۇلنار جالەلقىزىنىڭ ايتۋىنشا, سەگىز اۋداننىڭ مەكتەپتەرىنەن قاتىسقان وقۋشىلار مول ماعۇلمات الىپ قانا قويماي, بولاشاق باعدارىن انىقتاۋعا دا مۇمكىندىك الدى. فەستيۆال وقۋشىلاردىڭ ەڭبەك نارىعىندا سۇرانىسقا يە ماماندىقتار تۋرالى تۇسىنىكتەرىن كەڭەيتۋگە, بولاشاق ماماندىقتى سانالى تۇردە تاڭداۋعا, سونىمەن بىرگە جۇمىسشى ماماندىقتاردىڭ بەدەلىن ارتتىرىپ, بولاشاق تۇلەكتەر اراسىندا ورتا كاسىپتىك ءبىلىمدى تانىمال ەتۋگە ىقپال ەتەدى», دەپ اتاپ ءوتتى.
فەستيۆال اياسىندا قالا مەكتەپتەرىنەن جينالعان 4 مىڭنان استام وقۋشى تەحنيكالىق جانە كاسىپتىك ءبىلىم بەرۋ ۇيىمدارىنا ءتۇسۋ ەرەجەلەرىمەن تانىسىپ, ماماندىقتار تۋرالى كەڭەيتىلگەن اقپارات الدى. وزدەرىن تولعاندىرعان سۇراقتارعا جاۋاپ الىپ, وقۋلارىن كوللەدجدە جالعاستىرۋ تۋرالى ويلانىپ قايتقانى كەزدەسۋدىڭ ناتيجەلى بولعانىن كورسەتەدى. بولاشاق تالاپكەرلەر كوبىنە ات سالاسىنا, پەداگوگيكالىق, مەديتسينالىق, قوعامدىق تاماقتانۋ ماماندىقتارىنا قىزىعۋشىلىق بىلدىرگەن.
گۇلنار جالەلقىزى اتاپ وتكەندەي, كوبىنە بالالارى ءۇشىن اتا-انالار ماماندىق تاڭداپ جاتادى ءارى مۇنىڭ كوپ جاعدايدا وڭ ناتيجە بەرەتىنى انىق. سوندىقتان فەستيۆالگە اتا-انالار دا شاقىرىلىپ, بالالارمەن بىرگە قاجەتتى اقپاراتتار الدى. تىپتەن, كەيبىر اتا-انالاردىڭ بالالارىن كوللەدجگە جىبەرمەيمىز دەگەن رايىنان اينىپ قايتقانى قۋانتادى. كوللەدج ستۋدەنتتەرىنىڭ ءوز ماماندىقتارىنا بايلانىستى دايىنداعان تاقىرىپتىق نومىرلەرى كەلۋشىلەردىڭ قىزىعۋشىلىعىن ارتتىرا ءتۇسىپ, جىلىنا ءبىر مارتە وتەتىن فەستيۆالدى قايتالاپ وتكىزۋگە ۇسىنىس ءبىلدىردى.
الماتى
