بۇل ءىس-شارا – جاس ۇرپاقتىڭ بويىنا پاراساتتى ءپاتريوتيزمدى, بەرىك ءبىلىم مەن ءوزىن ءوزى قامشىلاپ, جەتىلدىرۋگە دەگەن عالامات قۇشتارلىقتى ۇشتاۋعا جانە قۇربىلارىنا ۇلگى ەتۋگە باعىتتالعان باستاما. ءارى وزدەرى اۋداندىق جانە قالالىق ىرىكتەۋ كەزەڭدەرىنەن وزىپ شىققان ورەندەر ەكەن. ولارعا وبلىس ورتالىعىنداعى دارىندى بالالارعا ارنالعان №3 وبلىستىق مامانداندىرىلعان مەكتەپ-ينتەرناتتىڭ جامپوزدارى قوسىلدى. جۇزدەن جۇيرىك, مىڭنان تۇلپار شىعاتىن, كورەرمەننىڭ قانىن قىزدىرىپ, كوكىرەگىنە ريزاشىلىق سەزىم ۇيالاتاتىن باسەكەنىڭ ءباسى دە كىلەڭ سايدىڭ تاسىنداي بۇگىنگى زاماننىڭ قياعا قانات قاققالى تۇرعان تەمىرقانات بالاپانداردىڭ كوپتىگىمەن قىزا ءتۇستى.
مازمۇنى تەرەڭ, ءماندى ءىس-شارانى ولىستىق ءبىلىم باسقارماسىنىڭ «اقمولا دارىنى» دارىندى بالالار مەن تالانتتى جاستاردى انىقتاۋ جانە قولداۋ جونىندەگى ورتالىعى مەن وبلىستىق «جاس ۇلان» بىرىڭعاي بالالار مەن جاسوسپىرىمدەر ۇيىمى» قوعامدىق بىرلەستىگى ۇيىمداستىرىپ وتىر. بايقاۋعا قاتىسۋشىلار الدىمەن جاتىق, جالىندى تىلمەن وزدەرىن تانىستىردى. بىلتىرعى وقۋ جىلىندا وتكىزىلگەن مازمۇندى ءىس-شارالار تۋرالى شولۋ جاسالدى. ارقايسىسى وزدەرىنىڭ قيال قاناتى جەتكەن جەرىنە دەيىن بارىپ, وزدەرى وسىلاي دۇرىس بولادى-اۋ دەپ توپشىلاعان باعىتى بويىنشا تۇزگەن باعدارلامالارىمەن تانىستىردى. اسىرەسە, شىعارماشىلىق شەبەرحاناسى كوپ كوڭىلىن وزىنە اۋدارعان مازمۇندى اتالىم بولدى.
قورىتىندىسىن ساراپقا سالعان كەزدە كوكشەتاۋ قالاسىنداعى اباي اتىنداعى دارىندى بالالارعا ارنالعان №3 وبلىستىق مامانداندىرىلعان مەكتەپ-ينتەرناتىنىڭ ۇلانباسى الۋا دۋلاتوۆا يە بولدى. تالابى تاس جاراتىن وزگە دە وقۋشىلار ارنايى سىيلىقتارعا يە بولدى. وسىنداي مازمۇندى شارالار ءجيى وتكىزىلسە, وزگە وقۋشىلار دا توپ جارعان تارلانبوزدارمەن ۇزەڭگى قاعىستىرماق بولىپ ۇمتىلا تۇسەر ەدى.
كوكشەتاۋ
