ايماقتار • 18 مامىر، 2022

سىردىڭ سۋى تومەندەپ بارادى

37 رەت كورسەتىلدى

سىرداريا وزەنىنەن قىزىلوردا وبلىسى اۋماعىنا سەكۋندىنا 520 تەكشە مەتر سۋ اعىپ كەلەدى، دەپ حابارلايدى Egemen.kz.

قازىرگى تاڭدا شاردارا سۋ قويماسىنا - 4،81 ملرد تەكشە مەتر سۋ، كوكساراي سۋ رەتتەگىش قويماسىنا 139 ملن تەكشە مەتر سۋ جيناقتالدى. ال قىزىلوردا سۋ تورابىنان سىرداريانىڭ تومەنگى اعىسىنا جىبەرىلگەن سۋ كولەمى - 56 تەكشە مەتر. سۋ دەڭگەيىنىڭ ازايۋىنا بايلانىستى اۋىل شارۋاشىلىعى داقىلدارى، ونىڭ ىشىندە كۇرىشتى 78 346 گەكتارعا ەگۋ مەجەلەنگەن.

«شاردارادان جوعارى ورنالاسقان سۋ قويمالارىنا جيناقتالعان سۋ كولەمى - 16،7 ملرد تەكشە مەتر. بۇل وتكەن جىلمەن سالىستىرعاندا 0،1 ملرد تەكشە مەترگە ارتىق. سىرداريا وزەنى باسسەينىندەگى ەڭ ۇلكەن سۋ قويماسى - توقتاعۇلدا 10 ملرد تەكشە سۋ بار. بۇگىندە كوكساراي سۋ رەتتەگىشىنە جيناقتالعان سۋدىڭ كولەمى 140 ملن تەكشە مەتردى قۇرادى»، دەدى ارال-سىرداريا باسسەيندىك ينسپەكتسياسىنىڭ ءبولىم باسشىسى سەيىتحان ابۋوۆ.

سوڭعى جىلدارى سىرداريا وزەنىندەگى سۋدىڭ تاپشىلىعى كولدەردىڭ قۇرعاۋىنا، اۋىل شارۋاشىلىعى داقىلدارىنىڭ ازايۋىنا اكەلۋدە. سۋ تاپشىلىعىنا بايلانىستى 20 جوبا ىسكە اسىرىلماق.

«بيىل جالپى ۇزىندىعى 1 034 شاقىرىمدى قۇرايتىن 162 كانالدى تازالاۋ جۇمىستارى جۇرگىزىلۋدە. جاڭاقورعان اۋدانىندا سىرداريا وزەنىندەگى ۇرمەلى سۋ توسپاسىنىڭ ىستەن شىعۋىنا بايلانىستى كەلىنتوبە ماگيسترالدى كانالى سۋلاندىرىلماق. سونداي-اق كەلىنتوبە ماگيسترالدى كانالىنىڭ 9،2 شاقىرىمى تازالانىپ، قوسىمشا سەكۋندىنا 14-15 تەكشە مەتر سۋ بەرۋ كوزدەلگەن»، دەدى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ ءبولىم باسشىسى جۇلدىزاي ايتجانوۆا.

«وبلىس بويىنشا بارلىق كانالداردان سەكۋندىنا 424 تەكشە مەتر سۋ الىنۋدا. دەگەنمەن سىرداريا وزەنىندە كۇردەلى سۋ تاپشىلىعى بولۋى مۇمكىن. اسىرەسە بۇل جاعداي جالاعاش، قارماقشى، قازالى اۋداندارىندا قاتتى سەزىلەدى. وبلىستىق اۋىل شارۋاشىلىعى باسقارماسىنىڭ مالىمەتىنە سايكەس، 55 927 گەكتارعا كۇرىش داقىلى ەگىلەدى. قالا جانە اۋداندار بويىنشا كۇرىش داقىلىن ەگۋ جۇمىستارىن 1 ماۋسىمعا دەيىن اياقتاۋ تۋرالى حات جولداندى. قاراپايىم شارۋا يەلەرى دە سۋ تاپشىلىعىن ەسكەرىپ، ەگىس كولەمىن ازايتۋى كەرەك. ولاي ەتپەگەن جاعدايدا قيىن جاعدايعا ۇشىراۋى مۇمكىن»، دەدى «قازسۋشار» رمك قىزىلوردا وبلىستىق فيليالى ديرەكتورىنىڭ ورىنباسارى جورابەك ەرنازاروۆ.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار