قازاقستان • 18 مامىر، 2022

ەلىمىزدە كيىك سانى كوبەيىپ كەلەدى

40 رەت كورسەتىلدى

2021 جىلدىڭ قورىتىندىسى بويىنشا ەلىمىزدە 842 مىڭ كيىك بار. سونداي-اق قۇزىرلى مەكەمە وكىلدەرى قازاقستاندا البينوس قۇرالاي تۋدى دەگەن جايتقا قاتىستى تۇسىنىك بەردى، دەپ حابارلايدى Egemen.kz.

وتكەن اپتادا قازاقستاندىقتار الەۋمەتتىك جەلىدە البينوس قۇرالايدىڭ ۆيدەوسىن تاراتا باستادى. كەيىن انىقتالعانداي، ۆيدەو بىرنەشە جىل بۇرىن رەسەيدە تۇسىرىلگەن. بۇل اقپاراتتى ەكولوگيا، گەولوگيا جانە تابيعي رەسۋرستار مينيسترلىگى راستاپ وتىر.

اتالعان جايتقا قاتىستى «وحوتزووپروم» رەسپۋبليكالىق مەكەمەسىنىڭ ءبولىم باسشىسى ازامات اقاەۆ تۇسىنىك بەردى.

«بىرىنشىدەن، جەلىدە تارالعان ۆيدەو قازاقستاندا تۇسىرىلمەگەن. ەكىنشىدەن، البينيزم — كوپكە بەلگىلى قۇبىلىس. ياعني ءتول اپپاق بولىپ تۋادى، ول سەبەپ گەننىڭ بۇزىلۋى. سول سياقتى البينوس عىلىممەن دالەلدەنگەن سيرەك كەزدەسەتىن قۇبىلىس»، دەدى ول.

ماماننىڭ ايتۋىنشا، كيىكتەردىڭ تولدەۋى جىل سايىن ءساۋىردىڭ سوڭىنان مامىردىڭ ورتاسىنا دەيىن جالعاسادى.

ء«بىز جىل سايىن كيىكتەردىڭ ەسەبىن جۇرگىزەمىز. بۇگىنگە دەيىن ەلىمىزدە البينوس كيىك ءتولىنىڭ تۋ جاعدايى تىركەلمەدى. قازاقستاندا كەڭ تاراعان ءۇش كيىك ءتۇرى بار. ول ءۇستىرت كيىكتەرى، بەتپاقدالا جانە ورال كيىكتەرى. وتكەن جىلدىڭ ەسەبى بويىنشا ەلىمىزدە 842 مىڭ كيىك بار. بيىل اتالعان كورسەتكىش ارتا تۇسەدى دەگەن ۇمىتتەمىز. شامامەن 1،2 ملن كيىككە جەتەدى دەگەن بولجام بار. جالپى الەم بويىنشا كيىكتەردىڭ 90 پايىزى ءبىزدىڭ ەلىمىزگە تيەسىلى»، دەيدى ا. اقاەۆ.

جىل سايىن كيىكتەر ەسەبى ولار تولدەپ بولعاننان كەيىن جۇرگىزىلەدى. ال ونىڭ قورىتىندىسى جىل سوڭىندا دايىن بولادى.

«كيىكتەر تولدەپ جاتقاندا كەدەرگى كەلتىرۋگە بولمايدى. ياعني ولاردى مازالاماۋ كەرەك. سول سياقتى كيىكتەرگە ساناق جۇرگىزۋ عىلىمي ۇيىمدار بەكىتكەن ادىسكە سايكەس جۇزەگە اسىرىلادى. ساناق نەگىزىنەن تىكۇشاقتىڭ كومەگىمەن جۇرگىزىلەدى. كيىكتەردىڭ تولدەۋ پروتسەسىن قۇزىرلى ورگاندار جانە سالالىق عىلىمي مەكەمەلەردىڭ وكىلدەرى مەن ماماندارى قاداعالايدى. جاعدايدى جىل بويى زەردەلەپ، جىل اياعىندا ونىڭ قورىتىندىسىن شىعارادى»، دەدى مامان.

«وحوتزووپروم» وكىلىنىڭ مالىمدەۋىنشە، ەلىمىزدە جىل ساناپ كيىكتەردىڭ كوبەيۋى بايقالادى.

«باقىلاۋ مەن قابىلدانىپ جاتقان شارالارعا قاراماستان براكونەرلىك فاكتىلەر بار. ءبىزدىڭ ينسپەكتورلار كيىك اۋلاۋشىلارمەن كۇرەستى تاۋلىك بويى جۇرگىزەدى. كيىك اۋلاۋ – ول قىلمىس. قىلمىستىڭ الدىن الۋ ماقساتىندا قۇزىرلى ورگاندارمەن بىرلەسىپ ءتيىستى شارالار قابىلدانىپ، قولدانىسقا ەنىپ جاتىر»، دەيدى ازامات اقاەۆ.

ايانا توعانبەك

 

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار