ەلىمىزدىڭ قۇراما كومانداسى ەرەسەكتەر مەن جاسوسپىرىمدەر اراسىندا توپ جارىپ, 34 التىن, 22 كۇمىس جانە 46 قولا جۇلدەگە يە بولدى. الەم كۋبوگىنىڭ جەڭىمپازدارى مەن جۇلدەگەرلەرىن نۇر-سۇلتان حالىقارالىق اۋەجايىندا جاقىندارى مەن جانكۇيەرلەرى ىستىق ىقىلاسپەن قارسى الدى.
الەمدىك دودانىڭ ءبىرىنشى جارىس كۇنىندە ونەر كورسەتكەن جەرلەستەرىمىز نۇرداۋلەت قالشورا, شىڭعىسحان تىلەمىسوۆ جانە 91 كەلىدە سىنعا تۇسكەن سالاۆات راحيمزانوۆ قارسىلاستارىنان قارا ءۇزىپ, الەم كۋبوگىنىڭ جەڭىمپازى اتاندى. سونداي-اق ەلوردالىق كيكبوكسەرلەر جانىبەك بۇرشاقباەۆ, ءاليحان وزدوەۆ جانە ءادىل مىرزاعاليەۆ كۇمىس جۇلدەگە سىنىق سۇيەم قالعاندا ءسۇرىنىپ, جارىستى ءۇشىنشى ورىنمەن اياقتادى.
«بۇل جەڭىس بىزگە ارينە وڭاي كەلگەن جوق. وسىنداي جوعارى ناتيجەلەرگە جەتۋ ماقساتىندا كوپ ەڭبەكتەندىك, وقۋ-جاتتىعۋ جيىندارىنا قاتىسىپ, ءوزارا تاجىريبە الماستىق. جاتتىقتىرۋشىمىز بەن اتا-انامىزدىڭ, تۋعان-تۋىستارىمىزدىڭ, جانكۇيەرلەرىمىزدىڭ سەنىمىنىڭ ارقاسىندا بۇگىنگى جارىستا جەڭىس تۇعىرىنا شىقتىق. بۇل ءبىز ءۇشىن ۇلكەن قۇرمەت», دەدى الەم كۋبوگىنىڭ جەڭىمپازى نۇرداۋلەت قالشورا.
سونىمەن قاتار ەلوردالىق سپورتشىلار ءار ءتۇرلى جاس ەرەكشەلىكتەرى مەن سپورت تۇرلەرى بويىنشا دا سىنعا ءتۇسىپ, ءوزارا مىقتىلاردى انىقتادى. فۋلل-كونتاكت بويىنشا سايىسقا تۇسكەن ايىمبەك بالقىبەك پەن باتىرحان قۋاندىكوۆ ءۇشىنشى ورىندى قانجىعالادى.
ەستەرىڭىزگە سالساق, 12-15 مامىر كۇندەرى تۇركيانىڭ ىستانبۇل قالاسىندا ەرلەر مەن جاستار اراسىندا كيكبوكسينگتەن الەم كۋبوگى ءوتتى. VII رەت وتكىزىلگەن الەمدىك دوداعا 45 ەلدەن 1000-عا تارتا سپورتشى قاتىستى.
جارىس قورىتىندىسى بويىنشا قازاقستاندىق سپورتشىلاردىڭ ناتيجەسى:
1-ورىن – قالشورا نۇرداۋلەت (57كگ);
1-ورىن – شىڭعىسحان (63.5كگ);
1-ورىن – سالاۆات راحيمزانوۆ (91كگ);
3-ورىن – جانىبەك بۇرشاقباەۆ (51كگ);
3-ورىن – ءاليحان وزدوەۆ (67كگ);
3-ورىن – ءادىل مىرزاعالي (71كگ).
فۋلل-كونتاكت:
3-ورىن – ايىمبەك بالقىبەك (51كگ);
3-ورىن – باتىرحان قۋاندىكوۆ (63,5كگ).
ايانا توعانبەك
