وڭىرلىك كوممۋنيكاتسيالار قىزمەتىندە وتكەن ءباسپاسوز جيىنىندا پاۆلودار وبلىسى تجد باسشىسىنىڭ ورىنباسارى قايرات شايماردەنوۆ اپاتتىڭ سەبەبىن ءمالىم ەتتى.
«قازىر تەرەك مامىعى تۇسەتىن كەزەڭ باستالدى. بالالار سونى ورتەپ وينايدى. تۇرعىندارعا بالالارىمەن كەڭەس وتكىزۋدى ۇسىنامىز. ال, ۇيىمداردىڭ باسشىلارىن ءوز اۋماقتارىن تازالاۋعا, اباي بولۋعا شاقىرامىز. ويتكەنى سالدارى اۋىر بولۋى مۇمكىن. مىسالى, كەشە بالالاردىڭ مامىق ورتەپ ويناۋى سالدارىنان ەكى قاباتتى تۇرعىن ۇيدە ءورت شىقتى», دەدى قايرات شايماردەنوۆ.
ونىڭ ايتۋىنشا, وقيعا ورنىندا تەرگەۋ جۇرگىزۋ كەزىندە بالالاردىڭ مامىق ورتەپ ويناعانى انىقتالعان.
«ۆيدەوسى دا بار. كۋاگەرلەردەن جاۋاپ الىندى. ولاردىڭ ايتۋىنشا, ءورتتىڭ شىعۋىنا بالالاردىڭ وتتى ابايسىز قولدانۋى سەبەپ بولعان», دەدى قايرات شايماردەنوۆ.
اتالعان فاكتىگە قاتىستى ءىس وبلىستىق پوليتسيا دەپارتامەنتىنە جولدانعان. كىنالىلەر بويىنشا سوڭعى شەشىمدى پوليتسيا دەپارتامەنتى شىعارادى.
