«جەرگىلىكتى اتقارۋ ورگاندارىنىڭ مالىمەتىنە سايكەس, بيىل مەكتەپ جاسىنداعى بالالاردىڭ 81,3 پايىزى جازعى دەمالىسپەن قامتاماسىز ەتىلەدى. ونىڭ ىشىندە 236 قالا سىرتىنداعى لاگەر, 11 مىڭعا جۋىق مەكتەپ جانىنداعى جانە 930-دەن استام شاتىرلى لاگەر جۇمىس ىستەيدى», دەدى ەسەنعازى يمانعاليەۆ ءبىلىم جانە عىلىم مينيسترلىگىندە وتكەن اپپارات جيىنىندا.
كوميتەت باسشىسىنىڭ ايتۋىنشا, بيىل جازعى دەمالىسپەن قامتىلعان بالالاردىڭ سانى وتكەن جىلعا قاراعاندا 800 مىڭعا ارتىق.
«بيىل از قامتىلعان وتباسى بالالارىنىڭ 61 پايىزى, ەرەكشە قاجەتتىلىگى بار بالالاردىڭ 64 پايىزى جازعى دەمالىسپەن قامتىلادى. سونىمەن قاتار ءبىلىم سالاسىندا ءتۇرلى جەتىستىكتەرگە جەتكەن بالالاردىڭ 78 پايىزى لاگەرلەرگە جىبەرىلەدى. ودان بولەك, 2 ملن 564 مىڭداي بالانى جازعى ەڭبەكپەن قامتۋ جوسپارلانىپ وتىر. اتاپ ايتقاندا, 86 966 قۇرىلىس وتريادىنا, ورمان جانە كوگالداندىرۋ جۇمىستارى مەن اۋلا كلۋبتارىنا جۇمىسقا تارتىلادى. سول سياقتى دەبات جانە قوسىمشا ءبىلىم ورتالىقتارىندا ەڭبەكتەنەدى», دەيدى ول.
ايانا توعانبەك
