تۇلكىباس اپب-عا بەس بىردەي جەرگىلىكتى تۇرعىن ارىزدانعان. ولار ءوز شاعىمىندا الاياقتىقتىڭ قۇربانى بولعاندىعىن كورسەتكەن. ياعني, ءوزىن «جەرسەرىكتىك بايلانىس جۇيەسى قىزمەتكەرىمىن» دەپ تانىستىرعان بەيتانىس جىگىت ميكروقارجى ارقىلى جابىرلەنۋشىلەردىڭ اتىنان نەسيە راسىمدەگەن. كەلتىرىلگەن جالپى شىعىن كولەمى 385 مىڭ تەڭگەگە جۋىق.
«اتالعان جايتتى پوليتسەيلەر قر قك-ءنىڭ 190-بابى (الاياقتىق) بويىنشا تىركەپ, دەرەۋ ىسكە كىرىستى. كۋالاردان جاۋاپ الىپ, كورشىلەس ايماقتارعا دا ىزدەستىرۋ شارالارىن جۇرگىزدى. جەدەل ۋاكىلدەردىڭ تىڭعىلىقتى اتقارعان جۇمىستارىنىڭ ناتيجەسىندە, كۇدىكتىنىڭ جەكە باسى انىقتالدى. ول سايرام اۋدانىنداعى تۇرعىلىقتى مەكەنجايىنان ۇستالىپ, پوليتسيا بولىمىنە جەتكىزىلدى. انىقتالعانداي, كۇدىكتى ەر ازامات جەرسەرىكتىك بايلانىس جۇيەسى كومپانياسىنىڭ قىزمەتكەرىمىن دەپ اۋدان تۇرعىندارىنىڭ سەنىمىنە كىرىپ, جەرسەرىكتىك تەلەارنالار ورناتۋعا جاڭادان تىركەۋ جۇمىستارىنىڭ ءجۇرىپ جاتقاندىعىن ايتقان. سودان تۇرعىنداردىڭ جەكە مالىمەتتەرىن جازىپ, بەت-بەينەلەرىن سۋرەتكە ءتۇسىرىپ العان. جانە وسى ارقىلى ارام ويىن جۇزەگە اسىرىپ, قارجى ۇيىمدارىنان جاسىرىن تۇردە نەسيە راسىمدەگەن. ال اقشانى العان سوڭ ءوز پايداسىنا جاراتىپ جىبەرگەن», دەپ جازىلعان اقپاراتتا.
تەكسەرۋ بارىسىندا ۇستالعان ازاماتتىڭ باسقا دا الاياقتىق جايتى بويىنشا ءىستى بولعانى بەلگىلى بولعان. قازىرگى تاڭدا كۇدىكتى قاماۋعا الىنىپ, تەرگەۋ امالدارى جۇرگىزىلۋدە.
