سوت قىزمەتىنە ۇمىتكەرلەرمەن كەزدەستى

ەلىمىزدە سوت قىزمەتكەرلەرى قۇرىلىمىن جاساقتاۋ – جوعارى سوت كەڭەسىنىڭ قۇزىرىندا. قازاقستان رەسپۋبليكاسى پرەزيدەنتى جانىنداعى اتالعان ورگان سوت قىزمەتىنىڭ بوس ورىندارىنا كانديداتتار قاراستىرىپ, ولاردى سوت لاۋازىمىنا تاعايىنداۋعا مەملەكەت باسشىسىنا ۇسىنىس بەرەدى. جىل باسىنان بەرى جوعارى سوت كەڭەسىنىڭ توراعاسى بەكتاس بەكنازاروۆ وبلىستاردى ارالاپ, ءار ۇمىتكەرمەن جەكە كەزدەسۋ وتكىزۋدە. ماقسات – ۇمىتكەردىڭ سوت قىزمەتى تالاپتارىنا سايكەستىگى مەن دايىندىق دەڭگەيىن انىقتاۋ. جوعارى سوت كەڭەسىنىڭ توراعا­­سى ب.بەكنازاروۆ كەزەكتى كەزدە­سۋ­ىن شىعىس وڭىرىندە وتكىزدى. شىعىس قا­­زاقستان وبلىستىق سوتىندا وتكەن كەزدەسۋگە وبلىستىق سوت ءتور­اعاسى ا.راحمەتۋلين, وبلىستىق سوت­تىڭ وقۋ باعدارلاماسىنىڭ ۇيلەس­تىرۋشىسى ا.كەنجەعارين قاتىستى. جوعارى سوت كەڭەسىنىڭ ءتور­اعا­سىمەن كەزدەسۋگە وڭىردەن 40 كانديدات قاتىسىپ, بىلىكتىلىك ەمتيحانىن تاپسىردى جانە سوت قىزمەتى بايقاۋىنا قاتىسۋ ءۇشىن ەڭبەك رەزەرۆىنە الىندى. بەكتاس بەكنازاروۆ ءار كانديداتپەن جەكە كەزدەسۋ بارىسىندا جەكە مالىمەتتەرىمەن تانىسىپ, ەڭبەك وتىلىنە, ادامگەرشىلىك قا­سيەتتەرىنە ءۇڭىلدى, سونداي-اق كانديدات تاڭدالعان قىزمەتكە دايىندىق دەڭگەيىنىڭ سايكەس كەلەتىنىنە نازار اۋداردى. سوت قىزمەتىنە ۇمىتكەرلەردىڭ زاڭنا­مالىق ءبىلىمىن, ونىڭ ىشىندە نور­ماتيۆتىك قۇقىقتىق اكتىلەر مەن زاڭعا ەنگىزىلگەن وزگەرتۋلەر مەن تولىقتىرۋلارعا جەتىكتىگىن تەكسەردى. كانديداتتار مەملەكەتتىك ءتىلدى مەڭگەرۋ دەڭگەيىن بايقاتاتىن ساۋالدارعا دا جاۋاپ بەردى. جوعارى سوت كەڭەسىنىڭ توراعا­سى شىعىس قازاقستان وبلىسىندا­عى كانديداتتاردىڭ دايىندىق دەڭ­گەيىنە وڭ باعا بەرىپ, باسىم بولىگىنىڭ جوعارى كاسىبي بىلىكتىلىك, ادامگەرشىلىك قاسيەتتەرگە يە جانە سوت قىزمەتى لاۋازىمىنا لايىقتى ەكەندىگىن جەتكىزدى. سونداي-اق, سوت لاۋازىمىنا كانديداتتى تاڭداۋعا بايسالدى تۇردە قاراۋ قاجەتتىگىن, سوت قىزمەتىنە تاعايىندالعان ادامنىڭ ەڭبەك ءوتىلىنىڭ سوڭىنا دەيىن حالىقتىڭ سەنىمى مەن قۇر­مەتىن اقتاپ, داق تۇسىرمەۋى كەرەكتىگىن اتاپ ءوتتى. دۋمان اناش, «ەگەمەن قازاقستان». وسكەمەن.