قوسشى قالاسى پوليتسيا ءبولىمىنىڭ ەسىرتكى قىلمىسىنا قارسى ءىس-قيمىل باسقارماسىنىڭ جەدەل قىزمەتكەرلەرى لەسنايا پوليانا تۇرعىن ءۇي ءماسسيۆىنىڭ اۋماعىندا 31 جاستاعى جەرگىلىكتى تۇرعىندى ۇستادى. ودان تەمەكى شەگۋگە ارنالعان قولدان جاسالعان قۇرالدار جانە ىشىندە وسىمدىك تەكتەس زاتى مەن ەرەكشە ءيىسى بار 100-گە جۋىق سىرىڭكە قورابى تاركىلەندى.
الىنعان زات ماريحۋانا بولىپ شىقتى. جوعارىدا اتالعان ەسىرتكى قۇرالدارىن ساتىپ الۋ ارناسىن انىقتاۋ ماقساتىندا پوليتسەيلەر قوسشى قالاسىندا ءساتتى ارنايى وپەراتسيا وتكىزدى. ناتيجەسىندە, رەسەي فەدەراتسياسىنىڭ 39 جاستاعى ازاماتى ۇستالدى.
شەتەلدىك جالعا العان ۇيدەن پوليتسيا ماسانىڭ تورلارىندا كەپتىرىلگەن بەلگىلى ءبىر ءيىسى بار سۇر-جاسىل ءتۇستى قاراسوراعا ۇقساس وسىمدىكتى تاۋىپ, سالماعى 19 كگ بولاتىن 35 بۇتانى تاركىلەدى.
سونىمەن قاتار ەسىرتكى زاتتارىن وسىرۋگە جانە وندىرۋگە ارنالعان ءار ءتۇرلى قۇرىلعىلار, سونىڭ ىشىندە كۇن ساۋلەسىن يميتاتسيالاۋعا ارنالعان ارنايى شامدار, توپىراققا ارنالعان تىڭايتقىش جانە تەمپەراتۋرا تەتىكتەرى تاركىلەندى.
2011 جىلدىڭ تامىز ايىنان باستاپ اتالعان تۇلعا رەسەي فەدەراتسياسىنىڭ قىلمىستىق كودەكسىنىڭ 111-بابىندا كوزدەلگەن قىلمىستىق ارەكەتتەرى ءۇشىن رەسەي ءىىمب تيۋمەن وبلىسى بويىنشا مەملەكەتارالىق ىزدەۋدە ەكەنى بەلگىلى بولدى.
قازىرگى ۋاقىتتا قر قك-ءنىڭ 297-بابى 2-بولىگىمەن (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) سوتقا دەيىنگى تەرگەۋ شەڭبەرىندە قۇرامىندا ەسىرتكى بار وسىمدىكتەردى زاڭسىز ءوسىرۋ فاكتىسى بويىنشا قىلمىستىق ءىس قوزعالدى (قر قك 300-بابى 2-بولىگى).
پوليتسيا قىزمەتكەرلەرى قاجەتتى تەرگەۋ شارالارىن جۇرگىزۋدە. ايىپتالۋشى قاماۋعا الىندى.
ايانا توعانبەك
