تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى شالبارىنىڭ قالتاسىنا جانە بىرنەشە جەرگە كومىپ, ەسىرتكى ساقتاعان, وعان قوسا Telegram ارقىلى ساتقان ەر ادامدى ۇستادى.
ەر ادامنان ايعاقتى زات رەتىندە 50-دەن استام پوليەتيلەن پاكەتكە سالىنعان سينتەتيكالىق ەسىرتكى الىندى. ناقتىراق ايتار بولساق, وبلىستىق ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى كۇندەلىكتى ەسىرتكى قىلمىسىن انىقتاپ, جولىن كەسۋ باعىتىندا جۇيەلى جۇمىس جۇرگىزىپ كەلەدى.
وسى باعىتتا كەزەكتى جەدەل ۋاكىلدەرمەن تىڭعىلىقتى اتقارىلعان شۇعىل ىزدەستىرۋ ءىس-شارالارى ناتيجەسىندە, شىمكەنت – سامارا تاس جولىنىڭ بويىندا Toyota اۆتوكولىگى توقتاتىلدى. كولىك ىشىندەگى جولاۋشىعا ءتىنتۋ جۇرگىزۋ بارىسىندا ونىڭ شالبارىنىڭ سول قالتاسىنان 36 دانا سارى ءتۇستى يزولەنتاعا ورالعان ەسىرتكى زاتىنا ۇقساس ۇنتاق تابىلىپ, تاركىلەنىپ الىندى.
سونداي-اق ۇستالعان جاس جىگىتتىڭ تەلەفونىن قاراۋ بارىسىندا Telegram الەۋمەتتىك جەلىسى ارقىلى ەسىرتكى ساتۋمەن اينالىسقانى بەلگىلى بولدى. تياناقتى تەكسەرۋ كەزىندە كۇدىكتىنىڭ تۇركىستان قالاسى اۋماعىندا سينتەتيكالىق ەسىرتكى سالىنعان ورامالاردى ءوزى بەلگىلەگەن جەرگە كومىپ, سول ارقىلى ساتاتىنى انىقتالدى.
كۇدىكتى ەر ازامات 15 دانا ورامانىڭ كومىلگەن ورنىن كورسەتتى. وسىلايشا شىمكەنتتىك كۇدىكتىدەن ىشىندە سينتەتيكالىق ەسىرتكىگە ۇقساس زاتى بار 53 دانا وراما الىنىپ, سوت-حيميالىق ساراپتاما تاعايىندالدى. زەرتتەۋ قورىتىندىسىنا سايكەس, تاركىلەنىپ الىنعان ەسىرتكى جالپى سالماعى 50 گرامنان استام مەفەدرون سينتەتيكالىق ەسىرتكىسى ەكەنى انىقتالدى.
اتالعان جايتتى پوليتسيا قىزمەتكەرلەرى سدتبت-عا قر قك-ءنىڭ 297-بابى (ەسىرتكى قۇرالدارىن, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, ساتىپ الۋ, ساقتاۋ, تاسىمالداۋ, جونەلتۋ نەمەسە وتكىزۋ) بويىنشا تىركەۋگە الدى. قازىرگى تاڭدا كۇدىكتى, ياعني شىمكەنت قالاسىنىڭ تۇرعىنى, جاس جىگىت قاماۋعا الىندى.
ايانا توعانبەك
