تاۋ تۇلعانىڭ ءور بەينەسىنىڭ بيىكتىگى – 3,30 مەتر بولسا, تۇعىرىنىڭ ۇزىندىعى – 2 مەتر, جالپى ەسكەرتكىشتىڭ تۇتاستاي العانداعى ەڭسەسى – 5,30 مەتر شاماسىندا. بۇل ۇلكەن ءمۇسىننىڭ اۆتورى التاي بەيسەنوۆ بولسا, ساۋلەتشىسى بەكزات بەيسەنوۆا ەكەن. باقاناس اۋىلىنا ەسكەرتكىشتىڭ اشىلۋىنا وراي جەرگىلىكتى بيلىك وكىلدەرى, دەپۋتاتتار, زيالى قاۋىم وكىلدەرى جانە اۋدان جۇرتشىلىعى جينالدى.
– حالقىمىزدىڭ ءبىرتۋار پەرزەنتى, مەملەكەت جانە قوعام قايراتكەرى دىنمۇحامەد احمەت ۇلى قوناەۆتىڭ تۋعانىنا بيىل 110 جىل. مەملەكەت باسشىسى قاسىم-جومارت توقاەۆتىڭ جارلىعىمەن قاپشاعاي قالاسىنا قوناەۆتىڭ ەسىمى بەرىلدى. بۇگىن, مىنە, قازاقتىڭ اياۋلى پەرزەنتىنە ۇلكەن قۇرمەت كورسەتىلىپ, ەڭسەلى ەسكەرتكىش ورناتىلدى. ءىرى تۇلعالاردىڭ ەرەن ەڭبەكتەرىن ۇلگى ەتىپ, ۇلىلاردى ۇلىقتاۋ – باستى پارىزىمىز. دىنمۇحامەد قوناەۆتىڭ بويىنداعى ۇلتجاندىلىق جاستارعا جۇعىستى بولسىن! قازاقتىڭ دارا تۇلعاسىنىڭ ەسكەرتكىشى قۇتتى بولسىن! – دەدى جيىندا ءسوز العان الماتى وبلىسىنىڭ اكىمى قانات بوزىمباەۆ.
ءوز كەزەگىندە ەل الدىنا شىققان دىنمۇحامەد احمەت ۇلىنىڭ ۇرپاعى ەلدار اسقار ۇلى قوناەۆ بۇل كۇندى تاريحي كۇن دەپ باعالاپ, ديماش اقساقال ءۇشىن اتا-باباسىنىڭ تۋعان جەرى باقاناستىڭ, ونداعى جۇرتشىلىعىنىڭ ءجونى مەن جولى ارقاشان ەرەكشە بولعانىن اتاپ ءوتىپ, حالىقتىڭ نيەتى مەن پەيىلىنە اۋلەتتەرى اتىنان ريزاشىلىق ءبىلدىردى. سونداي-اق سالتاناتتى ءىس-شارادا ءسوز العان پارلامەنت سەناتىنىڭ دەپۋتاتى بەيبىت يساباەۆ حالىق ىقىلاسى مەن كوڭىلىنەن شىققان تۇلعاعا دەگەن قۇرمەتتى ەشكىم دە, ەشقانداي كۇشپەن توقتاتا المايتىنىن ەرەكشە اتاپ ءوتتى. ال گەنەرال-لەيتەنانت امانگەلدى شابدارباەۆ «باقاناسقا دىنمۇحامەد احمەت ۇلىنىڭ ەسكەرتكىشىن قويۋ بالقاش حالقىنىڭ ارمانى ەدى, ۇزاق كۇتكەن ارمان بۇگىن ورىندالدى» دەدى.
ەسكەرتكىشتىڭ اشىلۋى سالتاناتىنان كەيىن دىنمۇحامەد قوناەۆ رۋحىنا قۇران باعىشتالىپ, اس بەرىلدى.
الماتى وبلىسى
