وقۋ-جاتتىعۋ اسكەري شەبەرلىك پەن جاۋىنگەرلىك ماشىق دەڭگەيىن ارتتىرۋعا, سونداي-اق ارنايى وپەراتسيالار كۇشتەرى بولىمشەلەرىنىڭ جاۋىنگەرلىك دايارلىعىن جەتىلدىرۋگە باعىتتالعان. ودان بولەك, مانەۆرلەرگە قاتىسۋ اسكەرلەردىڭ بەلگىلى ءبىر توبىنىڭ قۇرامىندا ءوزارا ءىس-قيمىلدى ۇيىمداستىرۋ تاجىريبەسىن جيناقتاۋعا مۇمكىندىك بەرەدى.
ءبىرىنشى كەزەڭ كومپيۋتەرلىك تەحنيكا مەن ەلەكتروندىق-ەسەپتەۋ جۇيەلەرىن قولدانۋ ارقىلى كوماندالىق-شتابتىق وقۋ-جاتتىعۋ تۇرىندە وتەدى. ال ەكىنشى كەزەڭدى بىرىككەن بولىمشەلەردە جاۋىنگەرلىك اتىسپەن بىرگە پراكتيكالىق ءىس-قيمىل تۇرىندە وتكىزۋ جوسپارلانىپ وتىر.
بيىلعى 28 مامىر مەن 9 ماۋسىم ارالىعىنا جوسپارلانعان بەلسەندى فازا بارىسىندا اسكەري قىزمەتشىلەر قۇرلىقتاعى جانە تەڭىزدەگى وپەراتسيالاردى جۇرگىزۋ مەن دەسانت ءتۇسىرۋ كەزىندەگى قاجەتتى داعدىلاردى بىرلەسىپ پىسىقتايتىن بولادى.
بيىل «ەفەس – 2022» وقۋ-جاتتىعۋىنا شامامەن 40 ەلدىڭ اسكەري قىزمەتشىلەرى قاتىسىپ جاتىر.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, 2022 جىلعى 19 قاڭتاردا قازاقستان قارۋلى كۇشتەرىنىڭ قۇرىلىمىندا ارنايى وپەراتسيالار كۇشتەرىنىڭ قولباسشىلىعى قۇرىلعانىن اتاپ وتكەن ءجون.
قورعانىس مينيسترلىگى كۇشتەر مەن قۇرالداردىڭ قۇرامىن, قولباسشىلىقتىڭ مىندەتتەرى مەن فۋنكتسيالارىن ناقتىلادى.
ارنايى وپەراتسيالار كۇشتەرى ەلدىڭ قورعانىس قابىلەتى مەن اسكەري قاۋىپسىزدىگىن قامتاماسىز ەتۋ شەڭبەرىندە, ونىڭ ىشىندە تەرروريزمگە قارسى وپەراتسيالارعا جانە زاڭسىز قارۋلى قۇرالىمدارعا قارسى ءىس-قيمىل جاساۋعا قاتىسۋ ارقىلى ارنايى مىندەتتەردى شەشۋگە ارنالعان.
