پرەزيدەنت • 13 مامىر، 2022

پرەزيدەنت ۇلتتىق بانكتىڭ جىلدىق ەسەبىن قابىلدادى

22 رەت كورسەتىلدى

اقوردادا مەملەكەت باسشىسىنىڭ توراعالىعىمەن ۇلتتىق بانكتىڭ 2021 جىلعى جۇمىسى تۋرالى ەسەبىن تىڭداۋعا ارنالعان كەڭەس ءوتتى، دەپ حابارلايدى Egemen.kz اقورداعا سىلتەمە جاساپ.

جيىنعا ۇلتتىق بانكتىڭ توراعاسى عالىمجان ءپىرماتوۆ، پرەزيدەنت اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ، پرەمەر-ءمينيستردىڭ ورىنباسارى ەرۇلان جاماۋباەۆ، قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا، ۇلتتىق ەكونوميكا ءمينيسترى الىبەك قۋانتىروۆ، سونداي-اق ۇلتتىق بانك توراعاسىنىڭ ورىنباسارلارى قاتىستى.

قاسىم-جومارت توقاەۆ 2021 جىلى جۇزەگە اسىرىلعان اقشا-كرەديت ساياساتىنىڭ قورىتىندىلارى، ينفلياتسيانى تەجەۋ جانە قارجىلىق تۇراقتىلىقتى قامتاماسىز ەتۋ شارالارى، بيۋدجەت كىرىسىن ارتتىرۋ، ۇلتتىق بانكتىڭ التىنۆاليۋتا رەزەرۆى مەن ۇلتتىق قورداعى اكتيۆتەردىڭ جاعدايى تۋرالى باياندامالاردى تىڭدادى.

بۇدان بولەك پرەزيدەنتكە دەپوزيتتەردى دوللارمەن سالۋ دەڭگەيىنىڭ 36،0 پايىزعا دەيىن تومەندەگەنى، مەملەكەتتىك قۇندى قاعازداعى نارىقتىق ينۆەستورلاردىڭ ۇلەسى 69،2 پايىزعا دەيىن كوبەيگەنى جانە حالىقتىڭ قولما-قول اقشاسىز تولەم جاساۋ وپەراتسيالارىنىڭ كولەمى 73،1 تريلليون تەڭگەگە دەيىن جەتكەنى جونىندە باياندالدى. 2021 جىلى دەپوزيتتەر 27،1 تريلليون تەڭگەگە دەيىن، سونىڭ ىشىندە تەڭگەمەن سالىنعان دەپوزيتتەر 17،3 تريلليون تەڭگەگە دەيىن ءوستى.

مەملەكەت باسشىسى ەلىمىزدە قابىلدانعان شارالاردىڭ ارقاسىندا قازاقستان ەكونوميكاسىنىڭ ءوسىمى 2021 جىلى 4،1 پايىز بولعانىن اتاپ ءوتتى. سونىمەن قاتار ينفلياتسيانىڭ ءوسىمى بۇرىن-سوڭدى بولماعان دەڭگەيگە كوتەرىلگەنىنە نازار اۋدارىپ، بيىلعى ءتورت ايدىڭ قورىتىندىسى بويىنشا 2016 جىلدىڭ قىركۇيەگىنەن بەرى ەڭ شارىقتاۋ شەگىنە، ياعني 13،2 پايىزعا جەتكەنىن ايتتى. پرەزيدەنت اتالعان ماسەلەلەردى شەشۋ ءۇشىن ۇكىمەتتىڭ، ۇلتتىق بانكتىڭ جانە باسقا دا مەملەكەتتىك ورگانداردىڭ جۇمىسىن كۇشەيتۋ ماڭىزدى ەكەنىنە توقتالدى.  

وسى رەتتە قاسىم-جومارت توقاەۆ ينفلياتسيانى بەلگىلەنگەن شەكتى مەجەگە قايتارۋدىڭ ماڭىزدى ەكەنىن اتاپ ءوتتى، سونداي-اق ۇكىمەتكە ۇلتتىق بانكپەن بىرلەسىپ، ينفلياتسيا دەڭگەيىن باقىلاۋ جانە تومەندەتۋ جونىندەگى 2022-2024 جىلدارعا ارنالعان كەشەندى شارالاردىڭ تولىققاندى جۇزەگە اسىرىلۋىن قامتاماسىز ەتۋدى تاپسىردى.

مەملەكەت باسشىسى ۇلتتىق قوردىڭ جۇمىسىنا ارنايى توقتالىپ، پاندەميا جاعدايىندا جانە ەكونوميكالىق احۋال ناشارلاعان كەزدە قور ءوز مىندەتىن تولىق ورىنداعانىن اتاپ ءوتتى. پرەزيدەنت ۇلتتىق قوردىڭ قارجىسىن ءتيىمدى پايدالانۋ قاجەتتىگىنە ءمان بەردى.

– ۇلتتىق قوردان جاسالعان ترانسفەرتتەر 2020 جىلى 4،8 تريلليون تەڭگەنى، ال 2021 جىلى 4،5 تريلليون تەڭگەنى قۇرادى. بيىل ۇكىمەت تاعى دا 4،6 تريلليون تەڭگە سۇراتىپ وتىر. بۇل – وتە قوماقتى قارجى. رەسپۋبليكالىق بيۋدجەت ۇلتتىق قوردىڭ قاراجاتىن پايدالانۋعا سۇيەنبەۋى كەرەك. ترانسفەرتتەردى بىرتىندەپ ازايتۋ قاجەت، – دەدى پرەزيدەنت.

بۇدان بولەك قاسىم-جومارت توقاەۆقا اكتسيالار نارىعىنىڭ وسۋىنە وراي تەڭگەرىمدى اللوكاتسياعا كوشۋ جونىندە باياندالدى. بۇل سوڭعى 3 جىل ىشىندە قوردىڭ كىرىسىن 10،75 ميلليارد دوللارعا جەتكىزۋگە مۇمكىندىك بەردى.

مەملەكەت باسشىسى ۇكىمەتكە ءىرى جوبالاردى نارىقتىق مەحانيزمدەر، مەملەكەتتىك-جەكەمەنشىك سەرىكتەستىكتەر، قارىز قاراجاتتارى، رەسپۋبليكالىق بيۋدجەت قارجىسىن قايتا ءبولۋ ەسەبىنەن جۇزەگە اسىرۋ مۇمكىندىكتەرىن پىسىقتاۋدى تاپسىردى. اتاپ ايتقاندا، قاسىم-جومارت توقاەۆ ەلىمىزدىڭ ترانزيتتىك الەۋەتىن كۇشەيتۋگە، سونىڭ ىشىندە «دوستىق-مويىنتى» تەمىرجول ۋچاسكەسى مەن باسقا دا بىرقاتار مەملەكەتارالىق تەمىرجول ءدالىزىن جاڭعىرتۋعا نازار اۋداردى.

سونىمەن قاتار جيىندا ۇلتتىق قوردىڭ ينۆەستيتسيالىق كىرىسىن ارتتىرۋ، اكتيۆتەردى ءتيىمدى باسقارۋ، التىنۆاليۋتا رەزەرۆتەرىنىڭ وتىمدىلىگى مەن ساقتالۋىن قامتاماسىز ەتۋ ماسەلەلەرى قاراستىرىلدى.

كەڭەس بارىسىندا  پرەزيدەنت تولەم تەڭگەرىمىنىڭ تاپشىلىعىنا قاتىستى ماسەلەنى كوتەردى جانە ونى بىرتىندەپ ازايتۋ قاجەت ەكەنىن اتاپ ءوتتى.

ۇلتتىق بانكتىڭ وكىلدەرى ۇلتتىق تولەم جۇيەسىن دامىتۋ جۇمىستارىنىڭ ناتيجەلەرى تۋرالى دا ايتتى. 2021 جىلى ۇلتتىق تولەم جۇيەسىنىڭ تولەم كارتالارىنىڭ بانكارالىق جۇيەسى مەن جەدەل تولەم جۇيەسى سياقتى كومپونەنتتەرى پيلوتتىق رەجيمدە ىسكە قوسىلعان. سونداي-اق تسيفرلىق تەڭگە پلاتفورماسىنىڭ ءپروتوتيپىن ازىرلەۋ جۇمىستارى اياقتالعان.

پرەزيدەنت جيىندى قورىتىندىلاي كەلە، ۇلتتىق بانكتىڭ جىلدىق ەسەبىن ماقۇلدادى.

– الەمدەگى قازىرگىدەي كۇردەلى كەزەڭدە ەلىمىزدىڭ قارجىلىق تۇراقتىلىعىن قامتاماسىز ەتۋ وتە ماڭىزدى. ۇلتتىق بانك قارجى نارىعىن رەتتەۋ جانە دامىتۋ اگەنتتىگىمەن بىرلەسىپ، اقشا-نەسيە ساياساتىنىڭ تيىمدىلىگىن ارتتىرۋعا باسا ءمان بەرۋى قاجەت جانە قارجى سەكتورىنىڭ الەۋەتىن ماقساتتى تۇردە كۇشەيتۋى كەرەك، – دەدى قاسىم-جومارت توقاەۆ.

سوڭعى جاڭالىقتار

ۇقساس جاڭالىقتار