ۇكىمەت • 13 مامىر، 2022

ءاليحان سمايىلوۆ كاسپي پورتتارىنىڭ ەكسپورتتىق الەۋەتىن ارتتىرۋدى تاپسىردى

ماڭعىستاۋ وبلىسىنا جۇمىس ساپارى بارىسىندا ۇكىمەت باسشىسى ءوڭىر تۇرعىندارىن سۋمەن جابدىقتايتىن ماڭىزدى كوزدەردىڭ ءبىرى «كاسپي» تۇششىلاندىرۋ زاۋىتىنا باردى، دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.

گاۋھار قاپاش

بۇگىنگى تاڭدا زاۋىتتا كەڭەيتۋ جوباسى اياسىندا قۇرىلىس-مونتاجداۋ جۇمىستارى جۇرگىزىلىپ جاتىر، بۇل تاۋلىگىنە سۋدىڭ ونىمدىلىگىن 40 مىڭ تەكشە مەترگە دەيىن ارتتىرۋعا مۇمكىندىك بەرەدى. جۇمىستاردى وسى جىلدىڭ سوڭىنا دەيىن اياقتاۋ جوسپارلانىپ وتىر.

«سۋمەن جابدىقتاۋ – ايماق ءۇشىن، اسىرەسە جازعى كەزەڭدە، ەڭ وزەكتى ماسەلەلەردىڭ ءبىرى. جىلدان جىلعا تۇششىتقىش قوندىرعىلار قۋاتىنىڭ جەتىسپەۋشىلىگى سەزىلەدى. وسىعان بايلانىستى ۇكىمەت زاۋىتتىڭ ونىمدىلىگىن ەكى ەسە ارتتىرۋ ءۇشىن ونى جاڭعىرتۋعا 12 ملرد تەڭگەدەن استام قاراجات ءبولدى. بۇل ماسەلە مەملەكەت باسشىسىنىڭ باقىلاۋىنا الىنعان. بارلىق جۇمىستى ساپالى ءارى ۋاقىتىندا جۇرگىزۋ قاجەت»، دەدى پرەمەر-مينيستر.

سودان كەيىن ءاليحان سمايىلوۆ قازاقستانداعى اممياك جانە اممياك سەليتراسىن وندىرەتىن جالعىز كاسىپورىن – «قازازوت» اق-عا بارىپ، وندا جاڭا بەيتاراپتاندىرۋ جانە بۋلاندىرۋ بولىمشەسىن ىسكە قوسۋ راسىمىنە قاتىستى. پرەمەر-مينيستر ۇكىمەت ەلىمىزدىڭ ونەركاسىپتىك دامۋىن ىنتالاندىرۋ بويىنشا كەشەندى شارالار قابىلداپ جاتقانىن ايتتى.

سونداي-اق پرەمەر-مينيستر جۇمىس ساپارى بارىسىندا كاسپي تەڭىزىنىڭ شىعىس جاعالاۋىندا بىرنەشە حالىقارالىق كولىك دالىزدەرىنىڭ قيىلىسۋ نۇكتەسىندە ورنالاسقان اقتاۋ تەڭىز ساۋدا پورتىنا باردى.

«ماڭعىستاۋ وبلىسىنىڭ حالىقارالىق ماڭىزى بار، اۋقىمدى كولىك-لوگيستيكالىق جانە ينفراقۇرىلىمدىق-سەرۆيستىك الەۋەتى زور. الايدا ەلىمىزدىڭ تەڭىز پورتتارىنىڭ مۇمكىندىكتەرى تولىق پايدالانىلمايدى، ال جۇكتەمە ورتا ەسەپپەن 21%-دى عانا قۇرايدى. بۇل جاعدايدى وزگەرتۋ قاجەت. يندۋستريا جانە ينفراقۇرىلىمدىق دامۋ مينيسترلىگى «قازاقستان تەمىر جولى» اق-مەن بىرلەسىپ، ترانسكاسپي حالىقارالىق كولىك باعىتى بويىنشا ەكسپورتتىق جۇكتەردى باعىتتاۋ ارقىلى اقتاۋ جانە قۇرىق تەڭىز پورتتارىنىڭ جۇكتەمەسىن ۇلعايتۋ ماسەلەسىن پىسىقتاۋى قاجەت»، دەدى ءاليحان سمايىلوۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز