ماراپاتتاۋ ءراسىمى بۇگىن نۇر-سۇلتان قالالىق توتەنشە جاعدايلار دەپارتامەنتىندە ءوتتى. ساعي جىلقىشيەۆ 8-قاباتتاعى تەرەزەدەن قۇلاعالى تۇرعان بالدىرعاندى قۇتقارعان ءسابيت شونتاقباەۆقا كومەك كورسەتكەن.
س. جىلقىشيەۆكە كورسەتكەن ەرلىگى ءۇشىن قر تج ءمينيسترىنىڭ بۇيرىعىمەن «توتەنشە جاعدايداعى ەرلىگى ءۇشىن» توسبەلگىسى, العىس حات پەن قولساعات تاپسىرىلدى.
ەسكە سالايىق, 11 مامىر كۇنى ءسابيت دوسىمەن بىرگە تاڭەرتەڭ جۇمىسقا بارا جاتقان كەزدە ادامداردىڭ شوعىرلانعان توبىن جانە 8-قابات دەڭگەيىندە ايعايلاپ تۇرعان بالانى كورگەن. ولار دەرەۋ پودەزگە جۇگىرىپ كىرىپ, كورشىلەر ارقىلى 7-قاباتقا كوتەرىلگەن. ءسابيت پەن ساعي قۇتقارۋ شارالارىنا بىردەن كىرىسكەن. سەبەبى ءاربىر سەكۋند ماڭىزدى بولدى. ءسابيت تەرەزە ارقىلى سىرتقا شىققان. ال ساعي ءبىر قولىمەن دوسىنىڭ اياعىن, ەكىنشى قولىمەن تەرەزەنى ۇستاپ تۇردى.
ء«بىز ايقايلاردى ەستىپ, ءىلىنىپ تۇرعان بالانى كوردىك. ويىمىز تەك بالانى قۇتقارۋ بولدى, ويلانباستان جۇگىردىك», دەپ اتاپ ءوتتى ساعي جىلقىشيەۆ.
