ەكى كۇنگە جالعاساتىن شەبەرلىك ساباعىنىڭ نەگىزگى ماقساتى – كاسىبي قارىم-قاتىناس پەن تاجىربيە الماسۋ ءۇشىن عىلىمي ورتانى ۇيىمداستىرۋ, بىلىكتىلىكتى ارتتىرىپ, جاڭالىقتارمەن ءبولىسۋ. ءىس-شاراعا رەسەي مەن گرۋزيا مەملەكەتىنەن ماماندار كەلدى. اتاپ ايتساق, مەديتسينا عىلىمدارىنىڭ كانديداتى, كلينيكالىق مەديتسينا عىلىمي-زەرتتەۋ ينستيتۋتىنىڭ مەديتسينا عىلىمدارىنىڭ دوكتورى, گرۋزيا مەديتسينا اكادەمياسىنىڭ اكادەميگى يليا گوتسادزە جانە مەديتسينا عىلىمدارىنىڭ كانديداتى, كولوپروكتولوگ, رف پرەزيدەنتى اكىمشىلىگىنىڭ «ەمحاناسى بار ورتالىق كلينيكالىق اۋرۋحاناسى» فەدەرالدىق مەملەكەتتىك بيۋدجەتتىك مەكەمەسىنىڭ كولوپروكتولوگيالىق ءبولىمىنىڭ مەڭگەرۋشىسى ارتەم گونچاروۆ قاتىسىپ, ءوز ويىن ورتاعا سالدى. قوناقتار پەرنەتاقتا ارقىلى ورىن الىپ وتىرعان وپەراتسيالىق بەينەباياندى كورسەتىپ, قاتەرلى دەرتتى ەمدەۋ جولدارىن جان-جاقتى تالقىلادى. سونىمەن قاتار قويىلعان سۇراقتارعا جاۋاپ بەرىپ, پىكىر الماستى.
ونكولوگيالىق ورتالىقتىڭ وبدومينالدى حيرۋرگيا بويىنشا اعا دارىگەرى التاي كەرىمقۇلوۆ ءىس-شارا جونىندە ويىن ورتاعا سالا كەلە: «ونكولوگيا عىلىمي ورتالىعىندا مازمۇندى ونكولوگيالىق اۋرۋلار بويىنشا شەبەرلىك ساباعى ءوتىپ جاتىر. مۇنىڭ اياسىندا وپەراتسيالار جاسالىپ, دارىستەر وقىلادى. شەبەرلىك ساباعىنا شەتەلدەن كەلگەن اتاقتى حيرۋرگتەر وپەراتسيالىق بولمەدە وپەراتسيا جاساپ جاتىر. وكپە وبىرى, توق ىشەك وبىرى, اسقازان وبىرى بويىنشا الدا تاعى دا وپەراتسيالار جاسالادى. بۇل رەتتە ءبىز كۇردەلى وپەراتسيالاردى جاساماقپىز, بۇرىن بۇل وپەراتسيالار قازاقستاندا بىرەن-ساران عانا جاسالاتىن. اسىرەسە وكپە وبىرى كەزىندە برونحوپلاستيكا دەگەن ءادىس بويىنشا وپەراتسيانى سيرەك قولعا الاتىنبىز. سول ادىستەردى وسى شەبەرلىك ساباعى اياسىندا ىسكە اسىرماقپىز. ودان كەيىن كىشى ءينۆازيۆتى وپەراتسيالار جاسايمىز. بۇل ءىس-شاراعا ءبىزدىڭ ورتالىقتىڭ دارىگەرلەرىنەن باسقا ەلىمىزدىڭ شالعاي قالالارىنان دا دارىگەرلەر كەلىپ قاتىسىپ, وزدەرىنىڭ ءبىلىمىن جەتىلدىرۋ ۇستىندە» دەدى.
ەمى جوقتاي كورىنگەن كوپ اۋرالاردىڭ بۇگىنگى تاڭدا شيپاسى تابىلىپ وتىرعانى ايقىن. مۇنى قازىرگى مەديتسينا سالاسىنىڭ جەتىستىگى دەپ ساناۋعا بولادى. ونكولوگيالىق اۋرۋلاردى ەمدەۋ ىسىنەن وتاندىق مەديتسينا ورتالىق ازيا بويىنشا الدىڭعى قاتاردا. ماسەلەن, 2024 جىلى بۇكىل ورتالىق ازيادا ىرگەسى قالانباعان پروتوندىق ساۋلەلىك ەم ورتالىعى ەلىمىزدە اشىلماق.
