كوللاجدى جاساعان زاۋرەش سماعۇل, «ەQ»
«5 ماۋسىم كۇنى وتەتىن بۇكىلحالىقتىق رەفەرەندۋمعا شىعارىلىپ جاتقان كونستيتۋتسيالىق وزگەرىستەردىڭ ىشىندە پرەزيدەنتتىڭ وكىلەتتىگىنە قاتىستى شەكتەۋلەر جۇرتشىلىق تاراپىنان ۇلكەن قىزىعۋشىلىق تۋدىرىپ وتىرعانى بارشامىزعا بەلگىلى. حالىق وسى ماسەلەنى كەڭىنەن بىلگىسى كەلەتىنى ايتپاسا دا تۇسىنىكتى عوي. بۇعان دەيىن ايتىلعانداي, الداعى ۋاقىتتا پرەزيدەنتتىڭ جاقىن تۋىستارى ءۇشىن ساياسي لاۋازىمدار مەن كۆازيمەملەكەتتىك سەكتوردا باسشىلىق لاۋازىمداردى اتقارۋعا شەكتەۋ قويىلادى. سونىمەن قاتار پرەزيدەنتتىڭ ءوز وكىلەتتىكتەرىن جۇزەگە اسىرۋ كەزەڭىندە ساياسي پارتيا مۇشەسى بولۋىنا تىيىم سالىناتىنى بۇعان دەيىن دە حابارلانعان بولاتىن. وسى وزگەرىستەردىڭ ماڭىزى زور ەكەنى راس», دەدى الما مۇقانوۆا.
ۆيتسە-مينيستر كەلتىرگەن دەرەكتەرگە زەر سالساق, اتا زاڭىمىزعا ەنەتىن وزگەرىستەر لەگى 12 بلوكتان تۇرادى. مەملەكەتىمىزدى دەموكراتيالاندىرۋ ۇردىسىندە اتالمىش باعىتتىڭ ارقايسىسىنىڭ وزىندىك ماڭىزى زور بولماق. قازاقستان حالقى وسى ماسەلەگە دە ايرىقشا نازار اۋدارعانى ءلازىم.
«الداعى ۋاقىتتا پرەزيدەنتتەن اكىمدەردى سايلاۋ جانە بوساتۋ قۇقىعى الىنىپ تاستالادى. بۇل پرەزيدەنت وكىلەتتىگىنىڭ قىسقاراتىندىعىنىڭ ايقىن كورىنىسى ەكەنى داۋسىز. قىسقاسى, وسى وزگەرىستەر سۋپەرپرەزيدەنتتىك باسقارۋ ۇلگىسىنەن باس تارتۋدىڭ جارقىن ۇلگىسى بولماق», دەدى ا.مۇقانوۆا.
بۇكىلحالىقتىق سيپاتقا يە بولاتىن رەفەرەندۋمنىڭ ناتيجەسىندە 17 ءوڭىردىڭ 11-ءى جاقتاپ داۋىس بەرسە, كونستيتۋتسياعا جوسپارلانعان وزگەرىستەر ەنگىزىلەدى. بۇگىنگى تاڭدا ەلەكتوراتتىڭ ءتىزىمى جاساقتالىپ جاتىر. ۆيتسە-ءمينيستردىڭ سوزىنە سەنسەك, رەفەرەندۋم ارقىلى كونستيتۋتسياعا بارلىعى 56 وزگەرىس ەنگىزىلەدى.
«5 ماۋسىم كۇنى وتەتىن رەفەرەندۋم ناتيجەسى ويداعىداي بولسا, كونستيتۋتسياعا بارلىعى 56 وزگەرىس ەنگىزىلەدى. وزگەرىستەردىڭ بارلىعىن جەكە-جەكە سارالاۋ ءۇشىن ءار ادامعا 56 بيۋللەتەن كەرەك بولادى. ونى تولىققاندى وقىپ شىعۋدىڭ قيىن ەكەنى دە راس. سول سەبەپتى دە بيۋللەتەندە ءبىر عانا ساۋال بولادى. ويتكەنى كونستيتۋتسياعا ەنگىزىلەتىن وزگەرىستەر ءبىر-بىرىمەن تىعىز بايلانىستى ەكەنىن كورىپ وتىرسىزدار. سوندىقتان وسىنداي نۇسقا تاڭدالىنىپ وتىر», دەدى مينيسترلىك وكىلى.
ءباسپاسوز ءماسليحاتى بارىسىندا ادىلەت ۆيتسە-ءمينيسترى الما مۇقانوۆا قازاقستان حالقىن بۇكىلحالىقتىق رەفەرەندۋمعا بەلسەندىلىكپەن قاتىسۋعا, مەملەكەتتىڭ كەلەشەگى ايقىندالاتىن شەشىمدى بىرلەسىپ قابىلداۋعا شاقىردى. سونداي-اق ول ءوز سوزىندە دەموكراتيالىق ۇردىستەردىڭ جاڭا سيپاتى كورىنىس تاباتىن ساياسي ناۋقاننىڭ ماڭىزىن ءاربىر ازامات ءتۇسىنۋى كەرەگىن اتاپ ءوتتى.
