قازاقستاندىق دەلەگاتسيانىڭ تۇركياعا ساپارى اياسىندا دەنساۋلىق ساقتاۋ ءمينيسترى اجار عينيات Nobel Ilac فارماتسەۆتيكا كومپانياسىنىڭ باسشىسى حاسان ۋلۋسويمەن جوبالاردى بىرلەسىپ ىسكە اسىرۋ ماسەلەلەرىن تالقىلادى.
«بۇگىن الماتى قالاسىندا ەكىنشى فارماتسەۆتيكا زاۋىتىن سالۋ جونىندەگى ىنتىماقتاستىق تۋرالى كەلىسىمگە قول قويىلۋى – دەنساۋلىق ساقتاۋ سالاسىنداعى ەكىجاقتى ىنتىماقتاستىقتى ودان ءارى جانداندىرۋ, سونداي-اق سەرىكتەستىك قارىم-قاتىناستارىمىزدىڭ تابىستى كورسەتكىشى», دەدى اجار عينيات كەزدەسۋ بارىسىندا.
مينيستر بيىل فارماتسەۆتيكا ونىمدەرىن شىعاراتىن «نوبەل افف» اق بىرلەسكەن قازاقستاندىق زاۋىتىنىڭ قۇرىلعانىنا تۋرا 20 جىل تولاتىنىن ەسكە سالدى.
«Nobel Ilac كومپانياسى قولدانىستاعى ءوندىرىستى جاڭعىرتۋعا جانە كەڭەيتۋگە, سونداي-اق الماتى قالاسىندا ساشە فورماسىنداعى پرەپاراتتار مەن جوعارى تەحنولوگيالىق بيوسيميليارلار ءوندىرىسى جولعا قويىلاتىن ەكىنشى فارماتسەۆتيكا زاۋىتىن سالۋعا قوسىمشا 55 ملن دوللار ينۆەستيتسيالاۋدى جوسپارلاپ وتىر», دەپ حابارلادى قازاقستاننىڭ دەنساۋلىق ساقتاۋ مينيسترلىگى.
قازىرگى تاڭدا جوبانىڭ سمەتالىق قۇجاتتاماسى مەن تەحنيكالىق-ەكونوميكالىق نەگىزدەمەسى ازىرلەنىپ جاتىر. ولاردى 2022 جىلعى ءبىرىنشى جارتىجىلدىقتىڭ سوڭىنا دەيىن اياقتاۋ جانە جوبانى كەزەڭ-كەزەڭمەن ىسكە اسىرۋ جوسپارلانىپ وتىر. جوبا 2025 جىلعى جەلتوقساندا تولىق اياقتالادى دەپ كۇتىلۋدە.
سونداي-اق ساپار اياسىندا اجار عينيات الماتى قالاسىندا فارماتسەۆتيكالىق پرەپاراتتاردى ءوندىرۋ بويىنشا Atabay Kimya Sanayi Ticaret كومپانياسىنىڭ باسشىسى زەينەپ اتابايمەن ەكىجاقتى كەلىسىمگە قول قويدى.
ءمينيستردىڭ ايتۋىنشا, اتالعان كاسىپورىن بىرەگەي دارىلىك زاتتار مەن مەديتسينالىق بۇيىمداردىڭ وتاندىق ءوندىرىسىن دامىتۋعا, وتاندىق فارماتسەۆتيكا ءونىمىنىڭ ەكسپورتتىق الەۋەتى مەن عىلىمي جانە كادرلىق الەۋەتىن ارتتىرۋعا مۇمكىندىك بەرەدى.
كەلىسىم اياسىندا Atabay Kimya Sanayi Ticaret كومپانياسى زاۋىت قۇرىلىسىنا 10 ملن دوللار ينۆەستيتسيالاۋدى جوسپارلاپ وتىر. جوبا 2023 جىلدىڭ سوڭىنا دەيىن ىسكە اسىرىلادى. 200-دەي جاڭا جۇمىس ورنى اشىلادى.
ايانا توعانبەك
