«قازاقستان ساياسي جانە الەۋمەتتىك-ەكونوميكالىق وزگەرىستەر جولىندا ءوز تاريحىنىڭ جاڭا پاراعىن اشادى. قازاقستان پرەزيدەنتى قاسىم-جومارت توقاەۆ وسى جىلدىڭ ناۋرىزىندا «جاڭا قازاقستان» تۇجىرىمداماسىن جاريا ەتتى. اتالعان تۇجىرىمداما قوعامنىڭ بارلىق ءومىرىن قامتيدى جانە زاڭ شىعارۋشى بيلىك ينستيتۋتىن نىعايتۋعا, ءاربىر قازاقستان ازاماتىنىڭ ساياسي شەشىمدەر قابىلداۋ پروتسەسىنە قاتىسۋ مۇمكىندىگىن كەڭەيتۋگە باعىتتالعان. تاياۋدا جاڭا ۇكىمەت جاساقتالىپ, ونىڭ الدىنا الەۋمەتتىك-ەكونوميكالىق ماسەلەلەردى شەشۋ مىندەتى جۇكتەلدى. سونىمەن قاتار قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن ينۆەستيتسيالىق ساياساتتىڭ جاڭا تۇجىرىمداماسى ازىرلەنەدى», دەدى رومان سكليار ەلوردادا ءوتىپ جاتقان قازاقستان-گەرمان بيزنەس فورۋمىندا.
ونىڭ ايتۋىنشا, الەمدىك ەكونوميكاداعى تۋربۋلەنتتىلىك جاعدايدا قازاقستان مەن گەرمانيا اراسىنداعى ءوزارا ءتيىمدى ىنتىماقتاستىقتى دامىتۋ ەرەكشە نازارعا الىنادى.
«ەكى ەل ورتاق قۇندىلىقتاردى بولىسەدى جانە بەيبىتشىلىك پەن تۇراقتىلىقتى نىعايتۋدى جاقتايدى. قازاقستان ەنەرگيانىڭ ارتاراپتانعان كوزدەرى, لوگيستيكا جانە مول تابيعي رەسۋرستار سىندى تارتىمدىلىقتىڭ ءۇش فاكتورىنا يە. بىزدە جاسىل ەنەرگيا وندىرىسىنە جانە ونى ودان ارى ەكسپورتتاۋعا مول الەۋەت بار. قىتايدان ەۋروپاعا جۇك تاسىمالداۋدا دا ەلىمىزدىڭ ترانزيتتىك الەۋەتى ارتا تۇسەدى», دەپ تۇيىندەدى ءبىرىنشى ۆيتسە-پرەمەر.
