«پاندەميادان تۋىنداعان شەكتەۋلەر جاعدايىندا ءبىز ەكىجاقتى ەكونوميكالىق ىنتىماقتاستىقتى دامىتۋ تەندەنتسياسىن ساقتاپ قانا قويماي, سونىمەن بىرگە ونلاين فورماتتى بارىنشا پايدالانا وتىرىپ, ناقتى جوبالار مەن ۇسىنىستاردى ىلگەرىلەتە الدىق. بۇگىندە گەرمانيا قازاقستاننىڭ ماڭىزدى سەرىكتەسى بولىپ وتىر. ساۋدا-ەكونوميكالىق ىنتىماقتاستىقتى تەرەڭدەتۋگە, ينۆەستيتسيالاردى ىنتالاندىرۋعا جانە ءوزارا قورعاۋعا باعىتتالعان بىرقاتار ۇكىمەتارالىق كەلىسىم جۇمىس ىستەيدى», دەدى رومان سكليار ەلوردادا ءوتىپ جاتقان قازاقستان-گەرمان بيزنەس فورۋمىندا.
ونىڭ اتاپ وتۋىنشە, ەكى ەلدىڭ ىنتىماقتاستىعى قازىرگى ۋاقىتتا دا ءساتتى دامىپ كەلە جاتىر. مەملەكەت باسشىسى قاسىم-جومارت توقاەۆتىڭ 2019 جانە 2020 جىلدارداعى گەرمانياعا ساپارىنان كەيىن ءوزارا قارىم-قاتىناس قارقىن الا ءتۇستى.
«بىرلەسكەن ينۆەستيتسيالىق جوبالاردى جۇزەگە اسىرۋ بارىسىندا تۋىندايتىن سۇراقتار مەن ماسەلەلەردى شەشۋگە باعىتتالعان ۇكىمەتتىك جۇمىس توبى قۇرىلدى. سونىمەن قاتار ىنتىماقتاستىقتىڭ اعىمداعى ماسەلەلەرىن تالقىلاۋ ءۇشىن گەرمانيالىق كومپانيالارمەن اي سايىن, ونىڭ ىشىندە ونلاين فورماتتا دا كەزدەسۋلەر وتكىزىلەدى. ينۆەستيتسيا تۇرعىسىنان الىپ قاراساق, 2005 جىلدان بەرى ءبىزدىڭ ەكونوميكامىزعا گەرمانيادان شامامەن 5,5 ملرد دوللار تىكەلەي ينۆەستيتسيا قۇيىلدى. ونىڭ باسىم بولىگى وڭدەۋ ونەركاسىبىنە سالىندى», دەدى ول.
