ەپيدەميولوگيالىق جاعدايدىڭ جاقسارۋى مەن كارانتيندىك شەكتەۋلەردىڭ جەڭىلدەتىلۋىنە بايلانىستى قر يدم ازاماتتىق اۆياتسيا كوميتەتى حالىقارالىق اۋە قاتىناسىن قالپىنا كەلتىرۋ جانە اۋە رەيستەرىن ۇلعايتۋ بويىنشا جۇمىستى قولعا الدى.
وسىلايشا, شىلدە ايىنان باستاپ قازاقستان مەن گەرمانيا اراسىندا اپتاسىنا 15 رەيس ورىندالاتىن بولادى, ونىڭ ىشىندە «ورال – فرانكفۋرت» باعىتى بويىنشا دا رەيستەر بار.
اتاپ ايتقاندا, بيىلعى 15 مامىردان باستاپ «ەير استانا» اۋەكومپانياسى ا321LR ۇلگىسىندەگى اۋە كەمەسىندە «نۇر-سۇلتان – فرانكفۋرت» باعىتى بويىنشا رەيستەردى اپتاسىنا 5-تەن 6 رەيسكە دەيىن, سونداي-اق 1 ماۋسىمنان باستاپ 6-دان 7 رەيسكە دەيىن ارتتىرۋدى جوسپارلاپ وتىر.
بۇدان باسقا, 2 ماۋسىمنان باستاپ «Lufthansa» اۆياكومپانياسى ا330/ا340 اۋە كەمەسىندە «فرانكفۋرت – نۇر-سۇلتان/الماتى» باعىتىنداعى تۇراقتى رەيستەر سانىن اپتاسىنا 4-تەن 5-كە دەيىن, 4 شىلدەدەن اپتاسىنا 7 رەيسكە دەيىن ۇلعايتپاق.
«بارلىق رەيس سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ جانە اۋەكومپانيا سايتىندا جاريالانعان كەستەگە سايكەس جۇزەگە اسىرىلاتىن بولادى. اۋە رەيستەرىنىڭ ۇلعايۋى ەكى ەل اراسىنداعى ءوزارا ىنتىماقتاستىقتىڭ ودان ءارى نىعايۋىنا, سونداي-اق ءتۋريزمنىڭ دامۋىنا ىقپال ەتەدى دەپ كۇتىلۋدە», دەلىنگەن ازاماتتىق اۆياتسيا كوميتەتىنىڭ مالىمەتىندە.
