الەم • 12 مامىر، 2022

فينليانديا قازاقستان ارقىلى جۇك تاسىمالدايتىن جاڭا باعىتتى ىسكە قوستى

فينلياندياداعى ەڭ ءىرى جۇك وپەراتورى Nurminen Logistics قىتايدان قازاقستان ارقىلى جۇرەتىن كونتەينەرلىك باعىتتى ىسكە قوستى، دەپ حابارلايدى Egemen.kz Azernews-كە سىلتەمە جاساپ.

گاۋھار قاپاش

«Nurminen Logistics-ءتىڭ العاشقى تولىق ولشەمدى كونتەينەرلىك پويىزى 2022 جىلدىڭ 10 مامىرىندا قىتايدىڭ چونگسين قالاسىنان وڭتۇستىك ترانسكاسپيلىك جاڭا باعىت بويىنشا اتتاندى»، دەلىنگەن كومپانيا حابارلاماسىندا.

جول قىتايدان باستالىپ، قازاقستان، ازەربايجان، گرۋزيا جانە رۋمىنيا ارقىلى ورتالىق ەۋروپاعا وتەدى. كومپانيا قازاقستاندىق تەمىرجولشىلارمەن بىرلەسە وتىرىپ، ەكى ايدىڭ ىشىندە جول باعىتىن نولدەن باستاپ قۇردى.

«جاڭا باعىتتاعى پويىز ۇلكەن سۇرانىسقا يە. 25 مامىردا جۇرەتىن كەلەسى پويىزعا ساناۋلى عانا ورىن قالدى. اپتا سايىن جۇرەتىن رەيس ماۋسىم ايىنا جوسپارلانىپ وتىر»، دەلىنگەن كومپانيا حابارلاماسىندا. بۇعان دەيىن Nurminen Logistics ترانسكاسپي حالىقارالىق كولىك باعىتىن دامىتۋ نيەتى تۋرالى مالىمدەپ، 16 ناۋرىزدا قازاقستان مەملەكەتتىك تەمىرجولىمەن كوممەرتسيالىق پايدالانۋ تۋرالى كەلىسىمگە قول قويدى.

بۇدان باسقا، Hellmann Worldwide Logistics نەمىس كومپانياسىنىڭ ازەربايجانداعى وكىلدىگى ءوزىنىڭ سەرىكتەستەرىمەن بىرلەسىپ قىتايدان ەۋروپاعا ازەربايجان ارقىلى ترانزيتپەن مارشرۋتتىق پويىزىن ىسكە قوساتىنى تۋرالى بۇرىن حابارلانعان بولاتىن. مارشرۋتتىق پويىز قىتايدىڭ سۋچجوۋ قالاسىنان قازاقستاننىڭ شەكاراسىنا دەيىن تەمىر جولمەن جۇرەدى، سودان كەيىن اقتاۋ پورتىنان باكۋ پورتىنا جونەلتىلەدى.

بۇگىنگى تاڭدا ترانسكاسپي كولىك باعىتى وڭتۇستىك كاۆكاز ارقىلى وتەتىن ماڭىزدى ترانسەۋرازيالىق ءدالىز بولىپ تابىلادى. باعىت وڭتۇستىك-شىعىس ازيا مەن قىتايدا باستالىپ، قازاقستان، ازەربايجان، گرۋزيا جانە تۇركيا ارقىلى ەۋروپاعا وتەدى. بۇل جاڭا جىبەك جولى باعىتتارىنىڭ ءبىرى، ء«بىر بەلدەۋ، ءبىر جول» جوباسىنىڭ ورتا ءدالىزى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز