سينوپتيكتەر 11 مامىردان 12 مامىرعا قاراعان ءتۇنى نوسەر جاڭبىر, نايزاعاي, ەكپىندى جەل سەكۋندىنا 20 مەترگە دەيىن جەتەدى دەپ حابارلاپ, داۋىلدى ەسكەرتۋ جاريالادى.
قالا اكىمدىگىنىڭ مالىمەتىنە سايكەس, سۋ باسۋ جاعدايلارىن بارىنشا ازايتۋ ماقساتىندا مەردىگەرلىك ۇيىمداردىڭ كەزەكشىلىگى ۇيىمداستىرىلعان. ال سۋدى بۇرۋ جانە سورۋ جۇمىستارىنا ءموبيلدى توپتار جۇمىلدىرىلدى. بارلىعى 609 ادام, 252 ارنايى تەحنيكا مەن 24 موتوپومپا شىعارىلدى. بۇدان بولەك, 2 050 قاپ قۇم دايىندالعان.
كۋاگەرلەردىڭ ايتۋىنشا, اباي داڭعىلىندا قاتتى سۋ تاسقىنى بولعان.
بۇدان بۇرىن «قازگيدرومەت» سينوپتيكتەرى 11 مامىردا قاتتى جاڭبىر جاۋىپ, نايزاعاي وينايتىنىن, سولتۇستىك-شىعىستان سەكۋندىنا 15-18 مەترگە جەتەتىن جەل سوعاتىنىن حابارلاعان ەدى.
