وڭىرلەر بويىنشا ەڭ جوعارى باعا ءوسىمى قاراعاندى وبلىسىندا 0,4%, تاعى 11 وڭىردە – نۇر-سۇلتان جانە شىمكەنت قالالارىندا, ماڭعىستاۋ, اقتوبە, اقمولا, قوستاناي, قىزىلوردا, باتىس قازاقستان, سولتۇستىك قازاقستان, الماتى جانە تۇركىستان وبلىستارىندا 0,3% تىركەلدى.
قر ساۋدا جانە ينتەگراتسيا مينيسترلىگىنىڭ ساۋدا كوميتەتىنىڭ توراعاسى ەرجان قازانباەۆتىڭ ايتۋىنشا, «اينالىم سحەماسى» قۇرالىنىڭ مونيتورينگى بەكىتىلگەن قارجىلاندىرۋ جوسپارىنىڭ تولىق قامتىلماعانىن كورسەتەدى.
سالالىق ۆەدومستۆو بولشەك ساۋدا وبەكتىلەرىنىڭ رۇقسات ەتىلگەن ساۋدا ۇستەمەسىن ساقتاۋى بويىنشا جەرگىلىكتى اتقارۋشى ورگانداردىڭ جۇمىسىن ۇيلەستىرۋدى جالعاستىرۋدا. وتكەن اپتادا رەيدتىك ءىس-شارالاردىڭ ناتيجەسىندە ءۇي ماڭىنداعى 33,6 مىڭ دۇكەن نەمەسە ساۋدا وبەكتىلەرىنىڭ 78,9%-ى قامتىلدى, 424 بۇزۋشىلىق انىقتالدى. سونىڭ ناتيجەسىندە ساۋدا ۇستەمەلەرى 15%-عا تومەندەدى.
اۋىل شارۋاشىلىعى مينيسترلىگىنىڭ دەرەكتەرىنە سايكەس, رەسپۋبليكا بويىنشا ءامات قورى شامامەن 744 مىڭ توننانى قۇرايدى, ونىڭ ىشىندە «اينالىم سحەماسى» اياسىنداعى قورلار – 108 مىڭ توننا, تۇراقتاندىرۋ قورلارىندا – 25,6 مىڭ توننا جانە 52,9 مىڭ تونناعا فورۆاردتىق كەلىسىمشارتتار جاسالدى.
اۋىل شارۋاشىلىعى مينيسترلىگىنە اكىمدىكتەرمەن بىرگە وڭىرلەر اراسىندا اۋىل شارۋاشىلىعى ونىمدەرىنىڭ قاجەتتىلىكتەرىن ەسكەرە وتىرىپ, ولاردى جەدەل تارتىپپەن جەتكىزىپ وتىرۋ ءۇشىن ءوندىرىس پەن تۇتىنۋ تەڭگەرىمىن تۇراقتى نەگىزدە وزەكتەندىرۋ تاپسىرىلدى.
«بۇگىنگى تاڭدا وڭتۇستىك وڭىرلەردە كوكونىستەردىڭ كەيبىر تۇرلەرى ءپىسىپ جاتىر. باعاسى ءوسىپ جاتقان كوكونىستەردى جەتكىزۋگە كەلىسىمشارت جاساۋ قاجەت. سونىمەن قاتار كۇزدە تۇراقتاندىرۋ قورلارىندا سالىستىرمالى تۇردە تومەن باعامەن قاجەتتى ازىق-ت ۇلىك كولەمى بولۋى ءۇشىن فورۆاردتىق ساتىپ الۋ بويىنشا قارجىلاندىرۋدى ارتتىرۋ قاجەت. بۇل جۇمىستى بۇگىننەن باستاپ جۇرگىزگەن ءجون», دەدى ءا. سمايىلوۆ وبلىس اكىمدەرىنە.
سونىمەن قاتار پرەمەر-مينيستر ساۋدا جانە ينتەگراتسيا مينيسترلىگىنە وبلىس اكىمدىكتەرىمەن بىرلەسىپ, ساۋدا ۇستەمەسىن, اسىرەسە, ونى كوتەرمە ساۋدا ورىندارىندا باقىلاۋعا ەرەكشە نازار اۋدارۋدى, سونداي-اق «اينالىم سحەماسىن» قارجىلاندىرۋدى 100% نىسانالى دەڭگەيگە دەيىن جەتكىزۋدى تاپسىردى.
«ينفلياتسيا ماسەلەلەرى حالىقتىڭ الەۋمەتتىك كوڭىل-كۇيىنە اسەر ەتەدى, ول كۇندەلىكتى باقىلاۋدا بولۋى ءتيىس. اكىمدەردىڭ وسى باعىتقا جەتەكشىلىك ەتەتىن ورىنباسارلارى جاعدايدى باقىلاپ, ءتيىستى شارالار قابىلداۋى قاجەت. بىزدە قاجەتتى قۇرالدار بار», دەپ تۇيىندەدى ءاليحان سمايىلوۆ.
ايانا توعانبەك
