پاۆلودار وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, جول اپاتى 9 مامىردا ساعات 20.40-تا باياناۋىل اۋىلىنان 20 شاقىرىم جەردە بولعان. Audi 80 B4 كولىگىنىڭ 47 جاستاعى جۇرگىزۋشىسى Volkswagen Crafter ميكرواۆتوبۋسىمەن سوقتىعىستى.
«جول اپاتى سالدارىنان ەكى اۆتوكولىك جىراعا اۋدارىلىپ كەتتى. Volkswagen Crafter-ءدىڭ 1986, 2000 جانە 2005 جىلعى ءتورت جولاۋشىسى ءتۇرلى جاراقات الىپ, اۋرۋحاناعا جەتكىزىلدى», دەدى پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتى.
سونىمەن قاتار, دارىگەرلەردىڭ اقپاراتى بويىنشا, زارداپ شەككەن توعىز ادامعا شۇعىل كومەك قاجەت بولدى. ءۇش ناۋقاس - 36 جاستاعى ەر ادام, 35 جاستاعى ايەل جانە 16 جاستاعى ءجاسوسپىرىم رەانيموبيلدەردە العاشقى كومەك كورسەتىلگەننەن كەيىن پاۆلودارعا جەتكىزىلدى. تاعى ءبىر زارداپ شەككەن 22 جاستاعى جولاۋشى وبلىستىق ورتالىققا اۋە كولىگىمەن تاسىمالداندى.
قالعان جولاۋشىلار دا ءتۇرلى جاراقاتپەن اۋرۋحاناعا جەتكىزىلدى. ايەلدەردىڭ ءبىرىنىڭ ساۋساعىنا امپۋتاتسيا جاسالدى, تاعى ءبىر ەر ادامنىڭ ەكى بارماعى ج ۇلىنىپ كەتكەن. زارداپ شەككەندەردىڭ اراسىندا 51 جاستاعى رەسەي ازاماتى بار.
ايانا توعانبەك
