وبلىستىق ءماسليحاتتىڭ كەزەكتى XV سەسسياسى بارىسىندا ءوڭىر باسشىسى دانيال احمەتوۆ ءبىلىم سالاسىن دامىتۋ ماقساتىندا اتقارىلىپ جاتقان جۇمىستار جايلى ايتتى. وتكەن جىلى وسى سالانى قارجىلاندىرۋ كولەمى ءۇش ەسەگە ارتقان.
«بىلتىر 208 ءبىلىم بەرۋ مەكەمەسى كۇردەلى جانە اعىمداعى جوندەۋدەن ءوتىپ, 600 مىڭ وقۋلىق ساتىپ الىندى. مەكتەپتەردىڭ ينفراقۇرىلىمىن جاقسارتۋ بويىنشا جۇمىستار اتقارىلۋدا. وبلىستا 3 اۋىسىمدى جانە اپاتتى مەكتەپتەر ماسەلەسى تولىعىمەن شەشىلگەن», دەدى دانيال احمەتوۆ.
ونىڭ ايتۋىنشا, مەملەكەت باسشىسى قاسىم-جومارت توقاەۆتىڭ 2025 جىلدىڭ سوڭىنا دەيىن رەسپۋبليكا بويىنشا 1000 مەكتەپ سالۋ تاپسىرماسىنا سايكەس, وبلىستا بارلىعى 33 مەكتەپ سالۋ جوسپارلانىپ وتىر.
«وتكەن جىلى سەمەي قالاسىنداعى شىعىس كەنتىندە 1200 ورىندىق مەكتەپ سالىندى. ستەپنوي كەنتىندە 300 ورىندىق مەكتەپتىڭ قۇرىلىسى اياقتالۋعا جاقىن. سونىمەن قاتار ريددەردە - 600, ۇلان اۋدانىندا 320 بالاعا ارنالعان مەكتەپتەر پايدالانۋعا بەرىلمەك. جالپى وسى جىلى 7 مەكتەپتى پايدالانۋعا بەرۋ جوسپارلانىپ وتىر», دەدى شقو اكىمى.
ايانا توعانبەك
