«قالا تۇرعىندارىمەن جۇيەلى تۇردە كەزدەسىپ تۇرامىز. بۇگىن ەسىل اۋدانىنىڭ تۇرعىندارىمەن كەزدەسىپ, اۋداندى دامىتۋ ماسەلەسىن تالقىلادىق. كەزدەسۋىمىز ىلعي دا «اشىق ميكروفون» فورماتىندا وتەدى. قاتىسۋشىلار تولعاندىرعان ساۋالدارىن قويا الادى. سۇراقتار سول سياقتى الەۋمەتتىك جەلى ارقىلى دا جولدانادى.
كەزدەسۋىمىز ءۇش ساعاتقا سوزىلىپ, 200-دەن اسا سۇراق قويىلدى, ۇسىنىستار دا ايتىلدى. ولاردى ورىنداۋ بويىنشا جوسپار قۇرامىز. ماسەلەن تۇرعىن ءۇي-كوممۋنالدىق شارۋاشىلىعى, الەۋمەتتىك نىساندار, جولدار, قوعامدىق كەڭىستىكتەر, ينفراقۇرىلىمدىق نىساندار سالۋ, گازداندىرۋ تۋرالى ماسەلەلەر قوزعالدى. سول سياقتى اپاتتى جاعدايداعى ۇيلەردى بۇزۋ, جارىقتاندىرۋ, ينتەرنەت, اۆتوبۋس, كوگالداندىرۋ, تىعىز سالىنعان قۇرىلىس سەكىلدى وزگە دە پروبلەمالار ايتىلدى», دەدى ەلوردا اكىمى.
قالا اكىمىنىڭ ايتۋىنشا, ەسىل – قارقىندى دامىپ كەلە جاتقان اۋدان. جىل سايىن تۇرعىندار سانى 40 مىڭعا ارتادى. مۇنىڭ ءبارى قالانىڭ ينفراقۇرىلىمىنا ايتارلىقتاي كۇش تۇسىرەدى. وسىنى ەسكەرە وتىرىپ, سوڭعى جىلدارى مەكتەپ, مەديتسينالىق ورتالىق, الەۋمەتتىك باسپانا, سپورت نىسانى, اۋلالار جانە ت.ب. قۇرىلىس كولەمى ايتارلىقتاي ارتتى.
«جۇيەلى باعىتتارعا تولىعىراق توقتالىپ وتەيىن. ەسىل اۋدانىنداعى كوشە-جول جەلىسىنە تۇسكەن كۇشتى جەڭىلدەتۋ ءۇشىن 2 كولىك كوپىرىنىڭ قۇرىلىسىن جۇرگىزىپ جاتىرمىز. ۇلى دالا داڭعىلىنداعى كوپىردىڭ قۇرىلىسىن بيىل اياقتاۋدى جوسپارلاپ وتىرمىز. ال ەسىل وزەنى ارقىلى وتەتىن تاۋەلسىزدىك داڭعىلىنداعى كوپىردىڭ ءبىتۋ مەرزىمى – 2023 جىل.
ماڭىزدى ماسەلەلەردىڭ ءبىرى – اۋداندى گازداندىرۋ. الماتى جانە سارىارقا اۋداندارى تولىعىمەن گازداندىرىلدى. ول ءۇشىن 680 كم-دەن استام گاز تاراتۋ جەلىسى سالىندى. بيىل ەسىل اۋدانىندا (ۇركەر, شۇبار, پريگورودنىي, تەلمان ەلدى مەكەندەرى, «Family Village», «Garden Village» شاعىن اۋدانى جانە ت.ب.) وسى باعىتتاعى جۇمىستى باستايمىز. شۇبار ىقشام اۋدانىندا گازداندىرۋدى جوبالاۋ جۇمىسى ءجۇرىپ جاتىر. الدىمەن گاز قۇبىرىن, ال كەلەسى جىلى كۆارتال ىشىندەگى جەلىلەردى سالامىز. مۇنىڭ ءبارى قالا ەكولوگياسىنا وڭ اسەر ەتەدى. سول سياقتى الداعى ۋاقىتتا قۇرىلىس جۇمىستارى قارقىندى جۇرەتىن اۋدانداردى جىلۋمەن قامتاماسىز ەتۋ ءۇشىن جەو-3 قۇرىلىسى جانداندى. قازىر جەرگىلىكتى 3 گاز قازاندىعىن جوبالاۋ جۇمىسى ءجۇرىپ جاتىر», دەدى التاي كولگىنوۆ.
سونداي-اق قالا اكىمى ەلەكتر, سۋ بەرۋ قۋاتىن الدىن الا ارتتىرۋ قاجەت ەكەنىن دە ايتتى.
«وتكەن جىلدان باستاپ سورعى-سۇزگى ستانتسياسىنىڭ (سسس-3) قۇرىلىسىنا كىرىستىك. نىسان وسى جىلدىڭ سوڭىنا قاراي ءىشىنارا پايدالانۋعا بەرىلەدى, ال 2023 جىلدان باستاپ جاڭا سسس-3 جۇمىسىنىڭ قۋاتىن ارتتىرامىز. ماسەلەن قازىر تاۋلىگىنە 300 مىڭ تەكشە مەتر سۋ تۇتىناتىن بولساق, سسس-3-ءتىڭ قۋاتتىلىعى تاۋلىگىنە قوسىمشا 100 مىڭ تەكشە مەتردەن اساتىن بولادى. سونداي-اق كارىز تازارتۋ قۇرىلىستارىن (كتق-2), «اراي», «جۇلدىز» جانە ت.ب. قوسالقى ستانتسيالاردى جوبالاۋدى جانە رەكونسترۋكتسيالاۋدى جۇرگىزەمىز.
كەلىپ تۇسكەن سۇراقتاردى شەشۋ ماسەلەسىن قولعا الدىق. كەزدەسۋدە ايتقانىمداي, پروبلەمالاردى شەشۋ قىسقا مەرزىمدى, ورتا مەرزىمدى, ۇزاق مەرزىمدى بولىپ بولىنەدى. وسىنداي كەزدەسۋلەردى قالانىڭ وزگە دە اۋداندارىندا وتكىزەمىز. اۋدانداردى ارالاپ, تۇرعىندارمەن كەزدەسۋدى ارى قاراي دا جالعاستىرامىز», دەپ جازدى ەلوردا اكىمى.
