سەناتتا ۇلتتىق قوردان 2022-2024 جىلدارعا ارنالعان كەپىلدەندىرىلگەن ترانسفەرت تۋرالى زاڭعا ەنگىزىلگەن وزگەرىستەر تۋرالى زاڭ جوباسى قارالىپ جاتىر.
«تۇزەتىلگەن ماكروەكونوميكالىق بولجام نەگىزىندە بيۋدجەت كىرىستەرى بويىنشا الدىن الا بولجام ناقتىلاندى. رەسپۋبليكالىق بيۋدجەت كىرىسى 2022 جىلى 10,2 ترلن تەڭگە كولەمىندە باعالانادى, بۇل بەكىتىلگەن جوسپاردان 955 ملرد تەڭگەگە جوعارى. ۇلتتىق قوردان كەپىلدەندىرىلگەن ترانسفەرتتىڭ مولشەرى 4 030 ملرد تەڭگەگە دەيىن نەمەسە 1 630 ملرد تەڭگەگە ۇلعايتىلادى. قاراجات مەملەكەت باسشىسى قويعان مىندەتتەردى ىسكە اسىرۋعا باعىتتالادى», دەدى الىبەك قۋانتىروۆ سەنات وتىرىسىندا.
ونىڭ ايتۋىنشا, 2022 جىلى بيۋدجەت تاپشىلىعىن 2 978 ملرد تەڭگە نەمەسە جالپى ىشكى ونىمگە قاتىستى 3,3% دەڭگەيىندە ايقىنداۋ ۇسىنىلادى. رەسپۋبليكالىق بيۋدجەتتىڭ شىعىستارىن تۇزەتىلگەن كولەمگە قاتىستى 2,7 ترلن تەڭگەگە ۇلعايتا وتىرىپ, 18,8 ترلن تەڭگە كولەمىندە ايقىنداۋ ۇسىنىلىپ وتىر.
«قورىتىندىلاي كەلە, 2022-2026 جىلدارعا ارنالعان الەۋمەتتىك-ەكونوميكالىق دامۋ بولجامى شەڭبەرىندە 2022 جىلعا ارنالعان ماكروكورسەتكىشتەر مەن بيۋدجەتتىك پارامەترلەردىڭ بولجامىن ناقتىلاۋ, ءبىرىنشى كەزەكتە مەملەكەت باسشىسىنىڭ تاپسىرمالارى مەن قابىلدانىپ جاتقان شۇعىل جانە جۇيەلىك سيپاتتاعى قۇجاتتاردىڭ نەگىزگى باعىتتارىن ىسكە اسىرۋعا باعىتتالعان», دەدى ءا. قۋانتىروۆ.
