ءتۋرنيردىڭ اشىلۋ سالتاناتىندا پرەمەر-ءمينيستردىڭ ورىنباسارى ەرالى توعجانوۆ, مادەنيەت جانە سپورت ءمينيسترى داۋرەن اباەۆ, ازيا كۇرەس فەدەراتسياسىنىڭ پرەزيدەنتى, قازاقستان رەسپۋبليكاسىنىڭ گرەك-ريم, ەركىن جانە ايەلدەر كۇرەسىنەن فەدەراتسياسىنىڭ باسشىسى, قازاقتىڭ داڭقتى پالۋانى داۋلەت تۇرلىحانوۆ, نۇر-سۇلتان قالاسى اكىمىنىڭ ورىنباسارى بەرىك جاكەنوۆ قاتىستى.
قر پرەمەر-ءمينيسترىنىڭ ورىنباسارى ەرالى توعجانوۆ قاتىسۋشىلارعا جىلى لەبىزىن ءبىلدىرىپ, ساتتىلىك تىلەدى.
بوزكىلەمدەگى باسەكە نۇر-سۇلتان قالاسىنداعى ج.ۇشكەمپىروۆ اتىنداعى «جەكپە-جەك» سارايىندا ءوتىپ جاتىر. ءوز كەزەگىندە گرەك-ريم, ەركىن جانە ايەلدەر كۇرەسىنەن فەدەراتسياسىنىڭ باسشىسى داۋلەت تۇرلىحانوۆ حالىقارالىق ءتۋرنيردىڭ ماقساتىن بىلايشا ءتۇسىندىرىپ بەردى:
«مامىر ايىنىڭ 3-5 كۇندەرى گرەك-ريم كۇرەسىنەن جاستار اراسىندا حالىقارالىق تۋرنير ءوتىپ جاتىر. بۇل – مارقۇم جاقسىلىق ۇشكەمپىروۆ اعامىزدى ەسكە الۋعا ارنالعان تۋرنير. وعان ورتا ازيانىڭ ءتورت مەملەكەتى – قازاقستان, وزبەكستان, قىرعىزستان, تاجىكستان ەلدەرى قاتىسىپ وتىر. بۇل باسەكەنىڭ باستى ماقساتى پالۋاندارىمىز حالىقارالىق سىنداردا شىڭدالىپ, تاجىريبە جيناپ, ايتۋلى باسەكەلەردە ەل نامىسىن ابىرويمەن قورعاسا ەكەن دەيمىز. بولاشاقتا قۇراما كوماندادا دەڭگەيى جوعارى پالۋاندارىمىز كوبەيسە دەپ وتىرمىز», دەدى ول.
نۇر-سۇلتاندا ەكىنشى رەت ۇيىمداستىرىلىپ وتىرعان حالىقارالىق تۋرنيردە 150-دەن اسا سپورتشى 10 سالماق دəرەجەسى بويىنشا باسەكەگە ءتۇستى.
«شەتەلدەن بولەك ءوز ەلىمىزدىڭ 17 وڭىرىنەن كەلگەن سپورتشىلارىمىز بوزكىلەمدە بەلدەسىپ جاتىر. ءوزىمىزدىڭ قۇراماعا توقتالسام, جاقىندا وتكەن ازيا بىرىنشىلىگىندە كوردىڭىزدەر, ۇلكەن جەتىستىكتەرگە جەتتىك. الدىمىزدا ازيا ويىندارى كۇتىپ تۇر. قۇرامامىز ۇلكەن دايىندىقپەن, جاۋاپكەرشىلىكپەن بارىپ, جوعارى ناتيجەگە قول جەتكىزەدى دەپ سەنەمىن», دەدى قر مسم دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ.
