بۇل تۋرالى بۇگىن ۇكىمەت وتىرىسىندا قر ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ ايتتى.
وتىرىس بارىسىندا مينيستر توپتىق سۋ قۇبىرلارىنىڭ قۇرىلىسىنا قاتىستى بايانداما جاسادى.
«جوسپارلانعان كورسەتكىشتەردىڭ ورىندالماي قالۋىنا كەي وڭىردە سۋ وتكىزگىشتەردەگى قۇرىلىس جۇمىستارىنىڭ ۇزاققا سوزىلۋى سەبەپ بولىپ وتىر. جاعدايدى تۇزەۋ ءۇشىن قانداي شارالار قابىلدانىپ جاتىر؟», دەپ سۇرادى وسى ورايدا ۇكىمەت باسشىسى ءاليحان سمايىلوۆ مينيستردەن.
سەرىكقالي برەكەشەۆتىڭ دەرەگىنشە, 2019 جىلعا دەيىن قۇرىلىسى ۇزاققا سوزىلعان 9 نىسان بولدى. سوڭعى ءۇش جىلدا 6 نىساننىڭ قۇرىلىسى اياقتالعان.
«ونىڭ ىشىندە 2019 جىلى قاراجال, سىرداريا مەن ماي توپتىڭ سۋ قۇبىرلارىن ىسكە قوستىق. 2020 جىلى تاعى ەكى نىسان – قاسكەلەڭنەن جيدەلى سۋ قۇبىرلارىن سالىپ بىتىردىك. بىلتىر پرەسنوۆ سۋ تاراتقىشىنىڭ ەكىنشى كەزەڭىن اياقتادىق. قالعان ءۇش نىسان بويىنشا ءتيىستى جول كارتاسى ازىرلەندى. سوعان وراي بيىل ەسقۇلا سۋ قۇبىرىنىڭ قۇرىلىس جۇمىستارىن ءبىتىرۋدى جوسپارلاپ وتىرمىز. ال قالعان ەكى نىسان – تالاپ سۋ قۇبىرى مەن پرەسنوۆ سۋ تاراتقىشىنىڭ قۇرىلىسىن 2023 جىلى اياقتاۋ جوسپارلانعان», دەدى ول.
ايانا توعانبەك
