قازاقستان ۇلتتىق بانكى 2022 جىلدىڭ ءبىرىنشى توقسان قورىتىندىسى بويىنشا تولەم بالانسىنىڭ الدىن الا باعالاۋىن قالىپتاستىردى. 2022 جىلدىڭ ءبىرىنشى توقسانىندا اعىمداعى شوت 2,2 ملرد اقش دوللارى مولشەرىندە پروفيتسيتپەن قالىپتاستى (2021 جىلدىڭ 1-توقسانىندا اعىمداعى شوتتىڭ دەفيتسيتى 1,6 ملرد اقش دوللارىن قۇرادى).
اعىمداعى شوتتىڭ تەرىس سالدوسىنىڭ وڭ ايماققا اۋىسۋى ساۋدا بالانسى جاعدايىنىڭ جاقسارۋىمەن بايلانىستى.
«ساۋدا بالانسىنىڭ ءپروفيتسيتى 9,9 ملرد اقش دوللارىن قۇراپ, وتكەن جىلدىڭ وسى كەزەڭىمەن سالىستىرعاندا 6,3 ملرد اقش دوللارىنا ءوستى.
ءپروفيتسيتتىڭ ءوسۋى تاۋارلار ەكسپورتىنىڭ يمپورتتان اسىپ تۇسەتىن ءوسۋ قارقىنىمەن قامتاماسىز ەتىلەدى. تولەم بالانسى (تب) ادىستەمەسى بويىنشا تاۋارلار ەكسپورتى 7,6 ملرد اقش دوللارىنا (+66,4%) ءوسىپ, 19,1 ملرد اقش دوللارىن قۇرادى. ەكسپورتتىڭ ارتۋى ەڭ الدىمەن مۇناي مەن گاز كوندەنساتىنىڭ الەمدىك باعاسىنىڭ وسۋىنە بايلانىستى.
تولەم بالانسىنىڭ ادىستەمەسى بويىنشا تاۋارلار يمپورتى 1,3 ملرد اقش دوللارىنا (+17,0%) ءوسىپ, 9,1 ملرد اقش دوللارىن قۇرادى. تىكەلەي شەتەلدىك ينۆەستورلاردىڭ كىرىسى 2,5 ملرد اقش دوللارىنا (+53,3%) ءوسىپ, 7,0 ملرد اقش دوللارىن قۇرادى. بۇل رەتتە كاپيتالعا قاتىسۋدان تۇسكەن كىرىس 1,7 ەسە ءوسىپ, 6,4 ملرد اقش دوللارىن قۇرادى. تابىستىڭ ءوسۋى ەكسپورتتالاتىن شيكىزاتقا الەمدىك باعانىڭ وسۋىمەن دە بايلانىستى», دەلىنگەن حابارلامادا.
