قارۋ تاپسىرعانى ءۇشىن تولەمدەر مولشەرى ولاردىڭ تۇرىنە, تەحنيكالىق كۇي-جايىنا بايلانىستى ءار داناسى ءۇشىن (10 اەك-تەن 100 اەك-كە دەيىن) 30 مىڭنان 306 مىڭعا دەيىن ءار ءتۇرلى بولادى. وتەماقى كولەمىن ءار وبلىستىق, قالالىق جانە اۋداندىق پوليتسيا ورگاندارىندا قۇرىلاتىن كوميسسيالار بەلگىلەيدى.
«مىسالى, 100 اەك-كە دەيىن نەمەسە 306 مىڭ تەڭگەنى – اۆتوماتتى ويىق قارۋدى تاپسىرعان ازامات الا الادى. مۇنداي سومانىڭ جارتىسى ويىق ۇڭعىلى مىلتىقتار مەن كاربيندەر ءۇشىن تولەنۋى مۇمكىن. تاپانشالار مەن رەۆولۆەرلەر ءۇشىن – 122 مىڭ تەڭگەگە دەيىن اقى تولەۋ بولجانادى. تەگىس ۇڭعىلى مىلتىقتاردىڭ ءاربىر داناسى بارىنشا 91 مىڭ تەڭگەگە باعالانۋى مۇمكىن», دەدى اسىلبەك ىدىرىسوۆ قر ءىىم ۇيىمداستىرعان ونلاين-بريفينگتە.
وتەماقى تولەۋ مەرزىمى – 1 اي. ونىڭ مولشەرىن ايقىنداۋ كەزىندە كوميسسيالار قارۋدىڭ تەحنيكالىق جاي-كۇيىن ەسكەرەدى جانە 3 ساناتقا بولەدى. 1-ساناتتاعى قارۋ ءۇشىن تولەم ۇسىنىلاتىن قۇنىنىڭ 100%-ىن, 2-ساناتقا 70%-ىن, 3-ساناتقا 30%-ىن قۇرايدى.
1-ساناتتاعى قارۋعا – پايدالانىلماعان جانە تەحنيكالىق اقاۋى جوق قارۋ نە بۇرىن پايدالانۋدا بولعان, بىراق اقاۋى جوق, تاۋارلىق تۇرىنە نۇقسان كەلمەگەن قارۋ جاتادى. 2-ساناتتا – ودان ءارى پايدالانۋعا كەدەرگى بولمايتىن, جەكەلەگەن تەحنيكالىق اقاۋى بار نەمەسە تاۋارلىق تۇرىنە نۇقسان كەلگەن قارۋ بار. جوندەۋگە جارامدى قارۋلار دا ەكىنشى ساناتقا جاتادى. 3-ساناتقا – تەحنيكالىق اقاۋ سالدارىنان پايدالانۋعا جارامسىز نەمەسە قاۋىپتى, جوندەۋگە, قالپىنا كەلتىرۋگە نەمەسە اۋىستىرۋعا جارامسىز قارۋلار جىبەرىلەدى.
ايانا توعانبەك
