الگى زيراتتا ۆوۆكا (اۋىلداعىلار وسىلاي اتاپ كەتكەن, شىن ەسىمى ۆلاديمير) ەسىمدى ازامات ماڭگىلىك ۇيقىدا جاتىر. ونى بىلگەن, كورگەن ادامدار ء«ۇي-كۇيى جوق, اراققا قۇمار, اۋىلدىڭ مالىن باققان ەدى» دەپ مەنسىنبەۋشىلىكپەن ەسكە الار ەدى. بىراق مەن ونىڭ جاساعان ءىس-ارەكەتتەرىنە كوز جۇگىرتىپ, وزگەشە ويعا بەرىلەتىنىم بار. «ۆوۆكا قايتىس بولدى» دەگەن حاباردى ەستىگەندە, جاقىن تۋىسىمنان ايىرىلعانداي كۇي كەشكەنىم راس.
ۆوۆكا تالاي جىل اۋىلدىڭ قويىن باقتى. مەكتەپ قابىرعاسىندا جۇرگەن كەزىم. بىردە ونىڭ تاماق سالىنعان قاپشىعىنا كوزىم ءتۇستى. ىشىنەن ەكى-ءۇش كىتاپتىڭ مۇقاباسى كورىندى. كىتاپتاردى قولىما الا بەرگەندە, كوزىمە وتتاي باسىلدى: جۇرت جاماندايتىن الگى ۆوۆكاڭ ءىلياس ەسەنبەرليننىڭ «كوشپەندىلەر» تريلوگياسىنىڭ ورىسشا نۇسقاسىن وقىپ ءجۇر ەكەن (ۆوۆكانىڭ قازاقشاسى ونشا ەمەس ەدى). قوي باققان كەزدە ەرمەك قىلادى عوي. سۇراستىرسام, كىتاپتاردى اۋىل كىتاپحاناسىنان جازدىرىپ الاتىن كورىنەدى. ال «اۋىلدىڭ كەيبىر ايتقىشتارى» كىتاپ وقۋ بىلاي تۇرسىن, كىتاپحاناعا اياق باسىپ كورسىن. كىتاپ وقۋ ماسەلەسىنە كەلسەك, جاستاردىڭ دا جاعدايى ءماز ەمەس. ۆوۆكانى جامان دەپ كور ەندى.
بۇگىندە قاي اۋىلدى الىپ قاراساڭ دا, جەرگىلىكتى جەردىڭ وتكەنى جايلى تارقاتىپ ايتار اقساقالداردىڭ قاتارى سيرەگەن. كەيدە قاريالاردىڭ ورتاسىندا وتىرىپ, اسەرلى اڭگىمە تىڭداعىڭ كەپ قۇلشىنىپ وتىراسىڭ. اتتەڭ... ۆوۆكا اڭگىمەنىڭ شەبەرى ەدى. اڭگىمەسىن «يا نە پونيال» دەپ باستايتىن-دى. جان-جاقتى ەدى جارىقتىق. قاي سالانى بولسىن, شاما-شارقىنشا قىزىقتى ەتىپ ايتىپ بەرەتىن. ءتىپتى بىلگەنىنشە اۋىلدىڭ تاريحىن تارقاتىپ, كىم-كىمگە قالاي تۋىساتىنىن جاتقا بىلەتىن. ونىڭ اڭگىمەسىنەن كەيىن كوڭىل كوكجيەگى كوتەرىلىپ قالاتىن ەدى. اۋىل مەشىتىنىڭ بىرقاتار قۇرىلىس جۇمىسىنا ۆوۆكانىڭ ەڭبەگى ءسىڭدى دەۋگە ابدەن بولادى. اقشاعا جالدانىپ ىستەسە دە, ءار شارۋانى تياناقتى اتقاراتىن. مەشىت جۇمىستارىنا اسار جاسالعان ۋاقىتتا اۋىلدىڭ تەپسە تەمىر ۇزەر كەيبىر جىگىتتەرى ۇيىندە دوڭبەكشىپ جاتقاندا, ۆوۆكا ساۋابى مول ىستەن قالىس قالمايتىن.
بۇگىندە بىرەۋدىڭ بويىنداعى كەمىستىكتى كورسە, مۇرىن شۇيىرە قارايتىندار از ەمەس. «كەدەيسىڭ» دەپ كەمىتەتىندەر دە جەتەرلىك. مال باعۋشى بولسىن, وت جاعۋشى بولسىن, مەكەمە باسشىسى بولسىن, ءبارىنىڭ دە اللا الدىنداعى دارەجەسى ءبىر. باۋىرمال بولايىق, اعايىن!
