اكىم سايلاۋعا قاتىسۋ تاجىريبەسىمەن ءبولىسىپ, اۋىلدىق جەرلەردە ۇگىت-ناسيحاتتىڭ ەڭ ءتيىمدى تۇرلەرىنىڭ ءبىرى حالىقپەن جەكە كەزدەسۋلەر بولاتىنىن اتاپ ءوتتى. ءوز كەزەگىندە وسك توراعاسى كانديداتتار ەشقانداي شەكتەۋسىز دەبات ۇيىمداستىرىپ, وتكىزۋگە جانە بۇل سايلاۋشىلارعا سانالى تاڭداۋ جاساۋعا ىقپال ەتەتىنىن اتاپ ءوتتى. اۋىل تۇرعىندارى وتكەن اۋىل اكىمىنىڭ سايلاۋىنا جانە وزدەرى سايلاعان اكىمنىڭ جۇمىسىنا وڭ باعا بەردى.
27 ساۋىردە ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ «ستۋدەنتتەر مادەنيەت سارايى» عيماراتىندا نۇرلان ءابدىروۆتىڭ ساياسي پارتيالار, ۇەۇ, قوعامدىق كەڭەس, ءماسليحات, باق وكىلدەرىمەن, قوعامدىق پىكىر كوشباسشىلارىمەن, بلوگەرلەرمەن, سايلاۋ كوميسسيالارىنىڭ مۇشەلەرىمەن ۇلكەن كەزدەسۋى ءوتتى. ءىس-شاراعا 558 ادام قاتىستى.
مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايتىلعان سايلاۋ پروتسەسىن ودان ءارى جەتىلدىرۋ ماسەلەلەرى بويىنشا مازمۇندى پىكىرتالاس ءوتتى. «قازاقستاندىق مۇگەدەكتەر كونفەدەراتسياسى» رقب وبلىستىق فيليالىنىڭ باسشىسى دارحان تىلەمىسوۆ مۇگەدەكتىگى بار ادامداردىڭ قوعامدىق ۇيىمدارى سايلاۋ تۋرالى زاڭناماعا ايەلدەرمەن, جاستارمەن, مۇگەدەكتىگى بار ادامدارمەن قاتار, سايلاۋ پارتيالىق تىزىمدەرىندەگى 30% كۆوتانى قامتيتىن تۇزەتۋلەردى قولدايتىنىن اتاپ ءوتتى. بۇل رەتتە ونىڭ پىكىرىنشە, ءماسليحات دەپۋتاتتارىن سايلاۋ كەزىندە دە وسىنداي كۆوتا قاراستىرىلۋى قاجەت.
بۇقار جىراۋ اۋداندىق ءماسليحاتىنىڭ حاتشىسى ءالي اسحات ماجوريتارلىق جۇيەنى ەنگىزۋ اياسىندا شاعىن سايلاۋ وكرۋگتەرىن قۇرۋدى, تيىسىنشە وكرۋگتەگى سايلاۋشىلار سانىن ازايتۋدى ۇسىندى. ونىڭ پىكىرىنشە, ەلدى مەكەندەر اراسىنداعى قاشىقتىق وڭتايلى بولسا جانە وكرۋگتەگى سايلاۋشىلاردىڭ سانى ەداۋىر ىقشام بولسا دەپۋتاتتىققا كانديداتتار سايلاۋالدى ۇگىت جۇمىستارىن ءتيىمدى جۇرگىزۋگە مۇمكىندىك الار ەدى دەگەن ويىن ورتاعا سالدى.
كوپتەگەن جىل بويى ۋچاسكەلىك سايلاۋ كوميسسياسىنىڭ حاتشىسى بولىپ جۇمىس ىستەگەن ناتاليا كليمەنكو سايلاۋ كوميسسيالارىنىڭ مۇشەلەرى كونستيتۋتسيالىق زاڭمەن جۇكتەلگەن ماڭىزدى فۋنكتسيالاردى ورىندايتىنىن العا تارتا وتىرىپ, ولاردىڭ مارتەبەسىن ارتتىرۋ تۋرالى ۇسىنىس جاسادى.
«مۇقالماس» قب باسشىسى مايرا ابدراحمانوۆا اۋماقتىق جانە ۋچاسكەلىك سايلاۋ كوميسسيالارى مۇشەلەرىنىڭ قۇزىرەتى تۋرالى ماسەلە كوتەردى. «اق جول» قدپ فيليالىنىڭ توراعاسى ەرمەك ءابىلدين اۋماقتىق سايلاۋ كوميسسيالارىنا سايلاۋ پروتسەسىنە قاتىسۋشىلاردى اقپاراتتاندىرۋ كەزىندە الەۋمەتتىك جەلىلەردى بەلسەندى پايدالانۋدى ۇسىندى.
قاراعاندىنىڭ تۇرعىنى سايات راحيموۆ ورتسايلاۋكوم ۇيىمداستىرعان كەزدەسۋلەر سايلاۋشىلاردىڭ سايلاۋعا دەگەن سەنىمىن ارتتىرۋعا ىقپال ەتەتىنىن اتاپ ءوتىپ, وسىنداي تاجىريبەنى وبلىستىق دەڭگەيدەگى اۋماقتىق سايلاۋ كوميسسيالارى دا وتكىزۋ كەرەك دەگەن پىكىرىن ءبىلدىردى.
ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ «جاستار ورتالىعى» كوۆوركينگ ورتالىعىندا وسك توراعاسىنىڭ ءوڭىر جاستارىمەن كەزدەسۋى ءوتتى. جاس سايلاۋشىلاردى ارالاس سايلاۋ جۇيەسىن ەنگىزۋ ماسەلەلەرى قىزىقتىردى. وسك باسشىسى ماجوريتارلىق جۇيە كانديداتتار اراسىندا ۇلكەن باسەكەلەستىككە اكەلەتىنىن اتاپ ءوتتى. سونداي-اق ول وسى قاعيدات بويىنشا سايلانعان دەپۋتاتتار پارتيالىق قۇرىلىمداردىڭ ەمەس, ءبىرىنشى كەزەكتە ءوز ەلەكتوراتىنىڭ مۇددەلەرىن بىلدىرەتىنىن, بۇل ولاردىڭ حالىق الدىنداعى جەكە جاۋاپكەرشىلىگىن ارتتىرۋعا ىقپال ەتەتىنىن اتاپ ءوتتى.
ستۋدەنت ءۇمىت سەرىكوۆانىڭ پىكىرىنشە, جاستاردىڭ سايلاۋعا دەگەن قىزىعۋشىلىعى تومەن, جاستار اراسىنداعى وسىنداي تاپتاۋرىنداردى جويۋ قاجەت. ال ستۋدەنت مارلەن قوجاحمەتوۆ داۋىس بەرۋگە قاتىسپاعانى ءۇشىن قۇقىقتىق جاۋاپكەرشىلىكتى قاراستىرۋدى ۇسىندى. قارمۋ ستۋدەنتى جادىرا ءمىناجات بيىل 18 جاسقا تولعانىن جانە ەندى ونىڭ داۋىس بەرۋگە قۇقىعى بار ەكەنىن ايتىپ, كەزدەسۋ بارىسىندا داۋىس بەرۋ ءتارتىبى, ازاماتتاردىڭ سايلاۋ قۇقىقتارى تۋرالى پايدالى اقپارات العانىن ءبىلدىردى.
باسقا وڭىرلەردەگىدەي, ەلەكتروندى داۋىس بەرۋدى ەنگىزۋ مۇمكىندىگى, ارتىقشىلىقتارى مەن قاۋىپ-قاتەرلەرىن ەسكەرە وتىرىپ, ونى قازاقستاندا قولدانۋ تاجىريبەسى تالقىلاندى.
كەزدەسۋ بارىسىندا سايلاۋ پروتسەسىنىڭ وزەكتى تاقىرىپتارى بويىنشا ءداستۇرلى ونلاين-ساۋالداما جۇرگىزىلدى. ال كەزدەسۋ قورىتىندىسى بويىنشا نۇرلان ءابدىروۆ بەلسەندى قاتىسۋشىلارعا «قازاقستانداعى سايلانبالىلىق تاريحى» كىتابىن تاپسىردى.
