بۇل – ەل تاريحىندا اباي قۇنانباەۆ پەن مۇحتار اۋەزوۆكە ارنالعان تۇڭعىش مونووپەرا. ونەر كەشى 2 بولىمگە بولىنگەن. «ابايعا تاعزىم» اتتى العاشقى بولىمدە ۇلى اعارتۋشىنىڭ «جاسىمدا عىلىم بار دەپ ەسكەرمەدىم», «سەگىز اياق», «قاراشادا ءومىر تۇر» سياقتى بىرنەشە ءانى شىرقالسا, «ابايمەن سىرلاسۋ» بولىمىندە اباي ولەڭدەرىنە ارنالعان ۆوكالدىق توپتاما جانە وزگە دە ولەڭدەرى ورىندالدى. جالپى, ونەر كەشىندە ابايدىڭ 15 شىعارماسى ۇسىنىلدى.
پاۆلودار قالاسىنداعى وبلىستىق يسا بايزاقوۆ اتىنداعى فيلارمونيانىڭ كونتسەرتتىك زالىندا وتكەن كەشكە جينالعاندار تەرەڭ ويعا بەرىلىپ, ءار تۋىندىنى ءۇنسىز تىڭدادى. كەش سوڭىندا عانا ورىندارىنان تىك تۇرىپ, دۋ قول شاپالاقپەن العىستارىن جاۋدىردى. شاحيماردان ءابىلوۆ: «كورەرمەندەردەن كۇتكەنىم دە سول. اۋديتوريا اباي ليريكاسىنىڭ كومەگىمەن ويلانىپ, تازارۋى كەرەك», دەپ كەشتىڭ ماقساتىن ايقىنداپ بەردى.
– بۇگىندە ابايدى وقيتىندار از. ونىڭ فيلوسوفياسىنا سەنبەيتىندەر دە بار. اباي – پلانەتارلىق اۋقىمداعى تۇلعا. ءبىز ويلانۋعا جينالدىق. ابايدىڭ ءوزى ايتقانداي, نەگىزگى ماقساتىمىز – جاستاردى اعارتۋشىلىققا ۇندەپ, ولارعا كومەكتەسۋ, – دەدى ش.ءابىلوۆ.
دارىندى ۆوكالشى ءوزىنىڭ «مۋزىكالىق ويلارىمەن» ەڭ اۋەلى جەرلەستەرىن سۋسىنداتۋدى كوزدەگەن. وسى رەتتە ونەر كەشى وبلىس ورتالىعىندا عانا ەمەس, ەكىباستۇز قالاسىندا, باياناۋىل جانە شارباقتى اۋداندارىندا دا ۇيىمداستىرىلدى. ال 18 مامىردا الماتى قالاسىنداعى اباي اتىنداعى وپەرا جانە بالەت تەاترىنىڭ ساحناسىندا قويىلادى دەپ كۇتىلۋدە.
